Ua lipotia le faia o se talanoaga umi i luga o le telefoni, a sui mai Amerika ma Saina, o ta’ita’i’au o militeli a atunuu e lua e taumafai ai e faatonutonu o la feeseesea’iga i le faaitu o Asia ma le Pasefika ma toe lipea nisi o feoota’iga tau militeli sa faaleagaina i le silia ma le 2 tausaga talu ai.
O le vaiaso nei na faatino ai lea talanoaga i le va o le ta’ita’i’au Amerika i le IndoPacific o Admiral Samuel Paparo ma General Wu Yanan o le ta’ita’i’au o le Ami a le People Liberation Army ma ua faailoga ai ma se laasaga aga’i i luma i le va o atunuu e lua.
Ua malilie nei la Saina ma Amerika e pei ona faailoa i le lipoti a le 9News e faaauau pea a la feutana’iga faapea i le lumana’i.
Ua faia ia talanoaga i le mae’a o le feiloa’iga a le Peresetene o Amerika, Joe Biden ma le ta’ita’i o Saina o XiJinping i se taimi ua tuana’i.
Puna o Faamatalaga: https://www.9news.com.au/world/us-and-chinese-military-commanders-hold-talks-to-reduce-south-china-sea-tensions/d63ed01b-2d26-448e-a3ad-4ad258e6f3c7
