Faia sailiiliga i le leiloloa ai o faila a nisi o Matagaluega a le Malo ona o se osofaiga faatekonolosi (malware computer virus)

O se faafituali i le leiloloa ai nisi o faamaumauga a le Matagaluega o Galuega tetele ma Felauaiga a le malo le Ministry of Works Transport and Infrastructure (M.W.T.I) ina ua maea ona faaulufale le faigamalo fou lea o loo tau sailia nei lona mafuaaga.

O le vaiaso na tea nei  na taua ai e le Ofisa Sili a le Matagaluega a le M.W.T.I ia Magele Hoe Viali i le Samoa Observer o le Samoa Airport Authority o le isi Matagaluega e fa ai Ofisa i Samoa ua aafia i le vairusi lea ua aafia ai le tele o faila mo galuega.

Taua e Magele “Oute malamalama o le ofisa na muamua aafia o le Samoa Airport Authority sosoo ai ma le Matagaluega o Tiute ma Lafoga, sosoo ai ma le Matagaluega o le Soifua Maloloina”.

Peitai o loo taua e le Ofisa Sili a le Samoa Airport Authority ia Silimana’i Ueta Solomona e le faamaonia nei faamatalaga ua aafia i se vairusi o tekonolosi faaonaponei lea na tulai mai le amataga o le masina.

O se faafituali na faateia tele ai le Minisita o Galuega tetele a le Malo le afioga ia Olo Fiti Vaai ina ua aafia le tele o faamaumauga taua a le tele o Matagaluega a le malo.

I le Aso Gafua e le’o mautinoa i le taimi na tulai mai ai lea faafitauli ma e le’i fia tali ai ini fesili na tuuina atu i le ono aofia ai o ni faiga faapolokiki i tua atu o nei faafitauli.Taua e le alii Minisita o le a faatali i se ripoti maumaututu o lea faafitauli faatoa fai lea o se faamatalaga e uiga i lea mataupu.

E fa ni komepiuta e patino le Matagaluega o Galuega Tetele ma Felauaiga i le vaega a le Coordination Sector ua le mafai ona maua faamaumauga taua o loo iai mo le faatinoga o galuega.

Taua e Magele “sa taumafai e toe saili mai nei faila taua lea na aafia i le Aso 2-3 o Aukuso ma e masalomia o le mafuaaga ona o se vairusi ua faaigoaina o le ransomware”.

O le taimi nei o loo faatautaia se suesuega i lea mataupu ma o loo talia se iuga.

Na taumafai atu foi ofisa faasalalau e faafesootai nisi o matagaluega o loo lisi mai e Magele na aafia mo se faamaoniaga peitai e le’i avanoa mo se tali.

O lenei lava mataupu na taua ai foi e le Taitai o le Malo Fiame Naomi Mataafa “Ua talanoa atu nei i le Minisita o Fesootaiga pe ua le tatau loa ona fai se suesuega poo le a tonu a le tulaga lea e taatia ai faamaumauga i totonu o ofisa ma Matagaluega a le Malo poo malu puipuia faamaumauga (computer records)”.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required