O le finauga a ni kamupani se lua mai fafo o loo lesitala i Samoa e mafua i le nofo aitalafu o le tasi o kamupani i se tupe e 3 tesimale 5 miliona tala, sa suesueina e le faamasinoga maualuga a le atunuu ia Novema o le tausaga na tea nei, ma faalauiloa ai i le masina nei o Ianuari lea faaiuga na fofogaina ia Tesema o le tausaga 2023.

O le kamupani o le Infinity o se kamupani e faamautu i le motu o Virgin Island ae o le M & M o se kamupani o loo faamautu i se vaega o le maota o le NPF i Apia.

O Aperila o le tausaga na tea nei na tapena ai e le Infinity se gaioiga faaletulafono ua ta’ua o le statutory demand e faamalosia ai le totogi atu o le 3 tesimale 5 miliona tupe Amerika na aitalafu e le kamupani o le M&M.

Peitai o le masina lava lea o Aperila o le 2023 na migoi ai le M&M ma fai lana taofiga faaletulafono ma oo ai le finauga a ia kamupani e lua i le faamasinoga maualuga a Samoa.

O suafa o i latou o loo umia ma faagaioia ia kamupani e pei ona faailoa i le faaiuga tusitusia o ni tagata Asia, ma o le taunuuga o le finauga ua faatumau le gaioiga faaletulafono a le kamupani o le Infinity ua faamalosia ai le totogi atu o lana 3 tesimale 5 miliona.

E lē o faailoaina i le faaiuga nisi o faamaumauga i le va o ia kamupani ina ua faamatuu lea seleni tele ona o ni aiaiga e noatia i auala faaletulafono lona faailoaina lautele.