Ua faatoese le Qantas ina ua ono lelei itula o faatali le pasese a se tasi o ana faigamalaga ae lei toe alu ese lava le vaa ae mulimuli ane toe faaleaogaina lea faigamalaga. 

Na lipotia e le 9News o le Faigamalaga a le Qantas QF93 sa fuafua mo Los Angeles i le Aso Gafua o le vaiaso nei ma sa tu tu ai le valele i le malaevaalele i Melepone ma le faamatalaga ua fai si mamafa o le vaalele ona o savili ma iu ina toe agai ai pasese i o latou aiga e lei taunuu le faigamalaga.

Faamatala e nisi o le pasese i le aufaasalalau sa la’u atu ia i latou faguvai ma nuts e talitali ai le taimi e alu ai le vaa ma o se tulaga lē manuia na iai.

O loo lipotia foi o loo faia galluega toe faaleleia i isi vaega o le malaevaalele ma ua faailoa e le sooupu a le Qantas, e faamalulu ia i latou na aafia i le mataupu lea ae sa tuai le taunuu ane a le vaalele i Melepone ona o tulaga faaletonu o le tau ae sa feagai foi ma nisi luitau ina ua taunuu ane i Melepone, o le ala lea ua mafua ai le faaiuga na faia.