O le aso lona fa lenei o le tauaofiaaga o le Palemene lona 17 a Samoa i totonu o le falefono i le malae o le faautugatagi i Tiafau.
O se aso na vaai ai le feiloai ma lulu aao o sui o vaega faaupufai uma e lua i totonu o le maota fono. O le uluai taimi lenei ua omai ai sui o le Palemene seia vagana ai isi itumalo o loo tālia a latou palota laiti mo le sailia o a latou sui faipule.
O se aso foi na faataunuuina ai le faatautoga o sui faipule filifilia to’a 18 a le HRPP.
Tusa ai ma aiaiga o le tulafono tumau o le a faataatia i luga o le laulauafono le faasologa o suafa o sui usufono e pei ona tuuina mai i tusi faamaonia o le filifilia o:
Tuilaepa Fatialofa Auelua Sailele Malielegaoi
Lauofo Fonotoe Nuafesili Pierre Lauofo
Sala Fata Pinati
Lautafi Fio Selafi Purcell
Tapunuu Niko Lee Hang
Loau Solamalemalo Keneti Soo
Faimalotoa Kika Stowers
Tuuu Anasii Leota
Sulamanaia Fetaia’i Tauiliili Tuivasa
Lenata’i Victor Tamapua
Leaalailepule Rimoni Aiafi
Ale Vena Ale
Lupematasila Tologata Tile Leia
Leaana Ronnie Posini
Suluimalo Amataga Penaia
Mauu Siaosi Puepuemai
Alai’asa Moefaauo Moananu
Peseta Vaifou Tevaga
O lenei faatautoga na faatautaia lea e lana afioga i le Fofoga Fetalai Papalii Li’o Taeu Masepau ma e ta’itoalima ona agai atu sui o le HRPP mo a latou tautinoga i luma o le fofoga o le maota.
Na maea lea sauniga faapitoa ona ave Loa o le faamālō a le Fofoga Fetalai iai latou ua faatautoina ma faamanatu le taua o a latou tiute fai.
Taua foi e Papalii “Ia avea lenei taeao e fai ma faamau o le ta femagaloa’i, o upu e masani ai le atunuu afai ua sala uta ia tonu Tai, afai foi ua sala fafo o fale lava na mafua ai ona maua le alofa”.
Na tali fuatai le taitai o le HRPP le susuga Tuilaepa e momoli le faafetai i le Fofoga Fetalai o le maota ae faapea foi le Palemia ma le Kapeneta mo le faato’ato’a talu ona tofia i latou e avea ma taitai o le Mālō.
