Ua faatauto nei le Palemia lona 42 o NIu Sila, le taitai o le National, Christopher Luxon i se sauniga na faia i le fale o le Malo i Ueligitone i le asō.
Ua faafeiloaia ai foi e le kovana sili Dame Cindy Kiro i lona tofiga fou e fai ma sui o le Tupu o Peretania.
Sa faatauto ai foi ma sui o le soofaatasi, le taitai o le ACT o David Seymour ma le taitai o le NZ First, Winston Peters, atoa ai ma le minisita o tupe o Nicola Willis ma le loia sili o Judith Collins.
O sui o le Kapeneta e aofia ai sui e toa 20, 14 mai le National, toatolu mai le ACT ma le tolu mai le NZ First.
E toavalu isi minisita i tua mai o le Kapeneta e aofia ai le toalima mai le National, toalua mai le Act ma le toatasi mai le NZ First.
O Gerry Brownlee lea ua lipotia o le a faatuina e avea ma Fofoga Fetalai o le maota.
O le Kapeneta la e aofia ai Dr Shane Reti o le minisita o le Soifua Maloloina ma le minisita o Tagata Pasefika, Erica Stanford o le minisita o Aoga ma Femalagaa’iga, Paul Goldsmith o le minisita o Faamasinoga, Arts and Culture, State Owned Enterprises ma le minisita o le Treaty of Waitangi.
O Chris Bishop ua filifilia e avea ma minisita o Fale, minisita o le Infrastructure, RMA Reform ma le minisita o Taaloga ma Faafiafiaga.
O Simeon Brown o le minisita o Malosiaga, Faigamalo Faalotoifale, Felauaiga ma Aukilani.
O Judith Collins ua avea ma Loia Sili a Niu Sila ma o le minisita o Puipuiga, Digitising Government ma le GCSB.
O Louise Upston lea ua avea ma minisita o le Komiuniti ma Auaunaga Ofofua e aunoa ma se totogi ma o le minisita foi o le Social Development and Employment.
Brooke Van Velden ua filifilia e avea ma minisita o Mataupu Faalotoifale, Fale Faigaluega, Sootaga ma le Saogalemu.
Shane Jones o le minisita o Vasa ma Faigafaiva, Regional Development and Resources.
O Mark Mitchell o le minisita o Faasaoga, Faalavelave Tutupu Faafuasei ma le minisita o Leoleo.
O le minisita o Faasao, Maori Crown, ma le Maori Development faapea le Whanau Ora.
O Matt Doocey ua mauaina le matagaluega o le ACC, Mental Health, Tulisi ma Taligamalo faapea le matagaluega o Talavou.
O le tamaitai o Melissa Lee ua avea ma minisita o le Tamaoaiga, Ethnic Communities ma Fesootaiga ma Faasalalauga, Nicole McKee o le minisita o Faamasinoga, Todd McClay o le a feagai ma le minisita o Faatoaga, Vaomatua, Faigafaiva ma Fefaatauaiga.
O le tamaitai o Casey Costello ua filifilia i le tofi minisita o Tiute ma Tagata Matutua.
