O le isi fonotaga a le Palemene o loo sosoo ai nei o le aso 19 o le masina o Tesema o lenei tausaga, lea ua faamoemoe atonu e tuuina atu ai se finagalo o le Pulega Faatonu ua aofia ai le Palemia ma Minisita o le Kapeneta, i fautuaga ua tuuina atu iai e le komiti faapalemene sa iloiloina le lipoti a le komisi suesue o faigāpalota.

O le faaiuina o galuega a le fono aoao faitulafono i le Aso Faraile na tea nei, na talia ai e le Palemene le lipoti a le komiti faapalemene o tulafono tumau, mataupu tau faigāpalota, talosaga ma tofiga faalefaavae.

O se lipoti ua teena ai le tele o fautuaga a le komisi suesue o faigāpalota ae talia na ni fautuaga faatasi ai ma ni teuteuga a le komiti.

O se finagalo o le pulega faatonu o le a iloa ai poo ā ni suiga o le a toe faia i le tulafono o faigāpalota faapea ni teuteuga o le faavae, e faasino tonu i fautuaga o le toe foi i itumalo faaleaganuu poo itumalo faaalalafaga, toe faatulai mai le itumalo o Gagaemauga Numera Lua i le toe faafoi iai o afioaga o Saleaula ma Salamumu, e faapena i le toe faafoi o Leauvaa i le itumalo o Gagaemauga Numera Tasi, toe aumai itumalo tu taulaga, faatūina se isi itumalo mo se isi nofoa o Aiga i le Tai, palota mai fafo o tagatanuu o Samoa, ma le aveesea poo le faatumau pe faia ni teuteuga i le aiaiga o le 10 pasene o nofoa o tamaitai.

Le taitai o le Malo le tamaitai Palemia, Afioga Fiame Naomi Mataafa, i se vaega o lana saunoaga na taualuga iai felafolafoaiga a le Palemene i le lipoti a le komiti faapalemene sa iloiloina le lipoti a le komisi suesue o faigāpalota.