Ua aumai le ofo lona tolu a le malo e faatatau i totogi o faiaoga o aoga tulagalua, ma ua mae’a sainia.
I le mae’a ai o le solo tetee tele a faiaoga i le masina talu ai o lea ua aumai le isi siitaga fou o totogi i le va o le 11% i le 14% mo le tolu tausaga a sau.
O le ofo lenei o le a maua ai e faiaoga o loo i le tumutumu o le faatulagana o totogi maua o faiaoga le tusa ma le $100,000 i le faaiuga o le tausaga fou, a o i latou o loo totogi i le tusa ma le $51,000 o le sii i le silia ma le $55,000.
E ese mai i totogi o lea foi ua faaopoopo aso ma’i e agavaa ai mai le 31 o loo iai nei i le 40 aso.
O se tasi o suiga o le a aloaia i le faaiuga o le kuata tolu o le 2025 lea e tuu mai ai le aso e tasi i totonu o le vaiaso e lē a’oa’o ai i le potu aoga ae faaaoga mo tapenaga, o lipoti faapea suega.
O lea na sainia maliega nei i le va o le iuni ma le matagaluega o aoga ananafi, ma o loo faatali le palota a faiaoga o aoga amata pe a toe a’e le kuata lua, poo le vaiaso fou.
