Ua sauni le faigamalo  a le Setete o Vitoria e faataitai le faaaogāina o tauvae poo bracelets mo tupulaga talavou e  molia i soligatulafono ogaoga.

O le faia o lea faataitaiga e faamautu ai o loo usitaia aiaiga o le tatala ai i tua.

E faailoa e le tauvae i leoleo pe ua iai se vaega o le sā ua solia e le talavou ma afai ae faamaonia o lona uiga o le a toe aveese le maliega na mafua ai ona tatala i tua.

Faamaonia e le malo e toalaiti lava le au solitulafono lea e toe faaleaga ai avanoa mo i latou o loo usitaia le tulafono.

Na saunoa foi le loia sili Jaclyn Symes o le faaaogāina o tauvae ia poo monitoring bracelets ua fesoasoani tele i le mataituina o nei talavou poo latou usitaia aiaiga o le tatala ai i tua. 

O loo tetee le Victorian Aboriginal Legal Services i lea fuafuaga, faapea o le faatino ai o lea faiga o le a aveese ai le saolotoga o le talavou pe afai e lei faamaonia ua solia se tulafono.

E ui i lea, ua lipotia o se gaioiga ua ave iai le lagolago a le asosi o leoleo i Victoria.