E iai le talitonuga e lei maua nisi e faatauina faletalimalo o le Manumea, Orator ma le Vaea hotel i Togafu’afu’a i le faatautu’i na faia i le faamasinoga maualuga talu ai nei, ma ua toe faasalalau ai e le Faletupe o Atina’e le manaomia o le faatau atu o ia pisinisi tau faletalimalo.
I faasalalauga a le faletupe i le fesootaiga o le api o foliga, o loo faailoa ai o le faletalimalo o le Orator e 8 miliona 830 afe lona tau, o le Manumea hotel e 4 miliona, 910 afe lona tau ma le Vaea hotel e 2 miliona 551 afe tala e faatau ai.
O nisi ia o faletalimalo ua faailoa e le Palemia i le fono ma tusitala i le vaiaso na tea nei, ua sefululima tausaga o nofo aitalafu i le Faletupe o Atina’e a le Malo.
E ese ai le mataupu i le faletalimalo o le Sheraton Aggie Grey i Vaisigano, e 50 miliona lana nonogatupe i le Faletupe o Atina’e lea o loo faia feutanaiga a le faipisinisi mai Saina na faatauina ma le Malo i se faiga e toe faaola ai le aitalafu.
