Ua faaopoopo pea nofoa ua umia e le vaega faaupufai o le Faatuatua i le Atua Samoa ua Tasi, ina ua manumalo uma ona sui tauva e toatolu i palota laiti a itumalo palota o Vaa o Fonoti, Siumu, ma Faleata 4, lea sa faatino i le Aso Faraile na tea nei.
O le taunuuga o ia palota laiti e pei ona faailoa e le Komesina o faigāpalota le faitauga aloaia, o le tofa Ale Vena Ale ua toe filifilia mo le nofoa o Faleata 4 na ia maua palota e 953, ae o le sui tauva tutoatasi le tofa Ulu Bismark Fuluasou Crawley e 488 palota na ia maua.
I le faiga filifiliga a le itumalo palota o Vaa o Fonoti, o le tofa Mau’u Siaosi Puepuemai ua toe filifilia i le aofaiga e 772 palota na ia maua, pito iai le sui tauva o le vaega e puipuia aiātatau a tagata le tofa Leausa Take Kitiona Naseri e 226 ana palota, ma le sui tauva o le pati fou ua ta’u faapuupuu i mataitusi o le CDRP o Feagai’imealelei Osovale Brown e 32 palota na ia maua.
O le faiga filifiliga a le itumalo o Siumu ua toe tulai mai ai le tofa Tu’uu Anasii Leota e 658 palota ua manumalo ai, tulaga lua le sui tauva tutoatasi o Faalogo Kapeli Faalogo Lafaele e 521 ana palota, ma le sui tauva o le vaega e puipuia aiātatau a tagata le tofa Tuu’u Amaramo Sialaoa Pagamalie e 196 palota na ia maua.
I faamaumauga a le ofisa o le komisi o faigāpalota ua molimauina ai, e silia i le ‘afa o le aofaiga o tagata palota i lola a itumalo na faia palota laiti sa agai e palota ae o le isi toatele e lei palota.
I Faleata 4 o le aofaiga o tagata palota i le latou lola e 2,255 ae na o le 1,440 tagata na palota, o lona uiga e 815 tagata e lei palota.
I Siumu e 2,259 le aofaiga o tagata palota i le lola ae na o le 1,375 na palota.
E 884 tagata palota o lea itumalo e lei usitaia le aiaiga o le tulafono o faigāpalota o loo faamalosia ai le tatau i tagata uma ua lesitala ona faatino a latou palota.
O le itumalo o Vaa o Fonoti e 1,673 le aofaiga o tagata i le latou lola palota, ae 1,032 na palota. E 641 i latou e lei palota i le Vaa o Fonoti, ma o i latou uma e lei usitaia lea aiaiga o le tulafono o faigāpalota o le a feiloai ma faasalaga tupe ua aiaia faaletulafono.
