E $6 miliona le isi fesoasoani faaopoopo a Niu Sila ua faailoa mo Gaza, faatasi ai ma Sudan.
O le faamaoniga lea mai le minisita o le va i fafo a Niu Sila, Winston Peters i le taeao nei a o iai i Aikupito e feiloai atu i le faigamalo a Aikupito ma le liki Arapi.
O totonu o lea $6 miliona, o le $2 miliona e tuuina atu i Malo Aufaatasi mo Gaza ae o le isi $4 miliona e mo tagata Sudan o loo pagatia faatasi ai ma atunuu tuaoi e aofia ai Aikupito.
I se saunoaga a le minisita, o loo ia faamausali ai le tu o Niu Sila faatasi ma Aikupito faapea le liki Arapi ma e tāua tele ia Niu Sila lana lagolago ia Gaza ma Sudan.
O le faasilasilaga i le taeao nei ua atoa ai le $17 miliona o fesoasoani a Niu Sila ua faamatuu atu i atunuu pagatia nei talu mai le taua i le va o Isaraelu ma Hamas i le masina o Oketopa o le tausaga talu ai.
