O le lē faamavae o le sui Faipule o Gagaifomauga 3 mai le tofi Minisita o le Kapeneta sa ia umia i le filifiliga a le tamaitai Palemia le afioga Fiame Dr Naomi Mataafa, ua faia ai le faai’uga a le Palemia e faamuta loa le tofi Minisita o Faato’aga ma Faigafaiva sa seei ai le susuga Laauli Leuatea Polataivao Fosi Schmidt.
Na faaalia e le Palemia le afioga Fiame Dr Naomi Mataafa, e le’i māmā le iloiloina o le mataupu talu ona faailoa lautele moliaga o Laauli ona sa ia faailoa muamua i lana faasalalauga i le Aso Faraile na te’a nei o le faamasinoga o le malu lea faaletulafono e avanoa mo soo se tagata Samoa e sa’ili ai le amiotonu.
O feiloa’iga a le Palemia ma le Susuga Laauli a o le’i faia le faai’uga ua faailoa nei, sa ave ai i le Faipule o Gagaifomauga 3 vaega e lua e filifili iai, o le faamavae ma le faamuta o lona tofiga.
Peitai na faailoa e Laauli i lana faasalalauga i le po o le Aso Tofi e le’i faia sana faai’uga e faamavae, ma e lē faamavae ma le tofi Minisita.
Na tulitatao lea faasalalauga i le finagalo faalaua’itele o le Palemia ua ia faia ai loa le i’uga e faamuta pe terminate le tofi Minisita o Laauli.
I le faasalalauga a le ta’ita’i o le malo o loo ia faailoa ai, o loo aiaia i le Tulafono Faavae ala faaletulafono e faafoe ai tofiga taualoa o le Pulega Faatonu.
O aafiaga ia o le malo pe a lē tausisia ia aiaiga faaletulafono auā o loo faatulaga mai ai ma aulape o ia tofiga ina ia faatumau ai le amio sa’o le integrity ma le ta’uleleia.
Ua toe faailoa e le afioga Fiame le tausaga e 2017 na filifili ai Laauli e faamavae mai le tofi Minisita o Faato’aga ma Faigafaiva ona o moliaga solitulafono sa tuua’ia ai i lea vaitau e pei ona silafia, ae peitai na te le’i talia le faamavae ina ua faatula’i mai le mataupu ua molia ai nei e leoleo.
O le Mataupu 33 o le Tulafono Faavae i lona puipui 3, o loo aiaia ai le Tuua o le tofi, ma le faafuaiupu 3 puipui (e) ma le puipui (o) o le faafuaiupu 2 o loo faailoa ai o le a oo ina avanoa le tofiga o soo se tasi lava Minisita pe afai o le tofiga o le minisita i lena tulaga ua soloia e le Ao o le Malo e faia i luga o le fautuaga a le Palemia i se tusi aloa’ia ua iai le faamaufaailoga o le Malo.
Ua faailoa e Laauli i lana faasalalauga a o le’i faailoa lautele le faai’uga a le Palemia ua faamuta ai lona tofi minisita, o le a ia talia soo se faai’uga e faia ia te ia, ma tapena ai loa isi laasaga mo le lumana’i.
