O le aso 4 o Aokuso o le tausaga nei lea ua iai le fuafuaga a le Pulega a le Faaputugatupe mo le Lumanai Manuia le NPF e tatala aloaia ai lona ofisa tele i Salelologa i Savaii. 

Na faamaonia mai lea vaega e le Ofisa Sili o le NPF Pauli Prince Shuren i luga o le Good Morning Samoa i le amataga o le vaiaso. O lenei atina’e faitau miliona na ta’ua e Pauli o se tasi o vaega o le famanatuina o le 50 tausaga o le tautua a le NPF i le atunuu. 

O lenei fale tele o le a avea ma uluai ofisa i Salafai o le a iai se lifi (elevator). 

Ta’ua i lipoti a le Samoa Observer na mae’a lenei galuega i le masina o Mati ma le fuafuaga e tatala aloaia i le masina o Aperila o le tausaga nei lava peitai sa tālia le taunuu atu o se tagata tomai faapitoa e fausia le lifi mo feoa’iga i totonu o le ofisa. 

E le gata i lea ona o aafiaga i le tapunia atoa ai o le atunuu, o se tasi o mafuaaga na faatuai ai fuafuaga mo lenei fale tele. E silia ma le $7 miliona tala le tau aofai o lenei faamoemoe ma sa amata mai le galuega i le masina o Me 2020.