Fuiavailili Egon Keil, Komesina Leoleo
Fuiavailili Egon Keil, Komesina Leoleo

Faamavae le Komesina o Leoleo

O le taeao nei na tuuina atu ai le tusi faamavae a le Komesina o Leoleo le afioga Fuiavailiili Egon Keil i le Ofisa o le Minisita o le Matagaluega o Leoleo le afioga ia Lefau Harry Schuster.

Ua 6 tausaga o tulai mai le afioga ia Fuiavailiili e tauave le tofi Komesina ma ua lua ai ana nofoaiga. O le tausaga e 2015 na filifilia ai lea tamālii i le tofi ma o se tagata muamua foi sa galue i fafo atu ma Samoa ua tauavea lea tiute taua.

E tele ni galuega na fai e Fuiavailiili mo le matagaluega e pei o aoaoga (training) mo malu o le malo ae le gata i lea o le tele o osofaiga ma maua mai ai laau faasaina i nisi o afioaga lea na taulamua ai le Alii komesina.

E tele foi ni faaseā na tuu atu i le amataga o le auaunaga a Fuiavailiili lea na masalomia ai ni ripoti e faapea ua tolegi faamiliteli Leoleo a Samoa.

Sa taofia foi ma molia i le tausaga e 2016 i le faia o faamatalaga le moni (false statements,) faasalaga lē faatulafonoina faasaga i le taofia ai o se alii i le tausaga e 2015. Na faamalolo le tumau e le Kapeneta mulimuli Ane faaleaogaina tuuaiga ona e le lava molimau.

O le tausaga e 2018 na toe filifilia ai o ia mo lana nofoaiga lona lua o le Komesina o Leoleo.

Sa tu foi Fuiavailiili i lona tofi ina ua tulai mau feeseeseaiga tulaga o faigapalota o lenei tausaga lea na savavali faatasi ai ma le vasega o faamasino i le falefono i le Aso 24 o Me peitai na tapunia faitotoa o le maota fono.

O le tausaga foi lenei 2021 na malaga ai Fuiavailiili i Niu Sila mo togafitiga faafomai ma toe foi ai Samoa.

O le Masina o Iulai na ia faailoa ai o le a faamuta laga auaunaga (retire) pe a maea lana konekarate i le tausaga fou peitai o lea ua faamavae nei ma e faamamalu lava i le Aso nei 23 o Aukuso 2021.

Na tuu atu faamanuiaga a le Minisita O Leoleo ma ia faafetaia ai Fuiavailiili mo lava tautua mo Samoa ma le Matagaluega.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required