Search

Faamautu e le Faamasinoga le Nofo a Faamausili Moli i le suafa Malietoa

Ua teena le talosaga e toe iloilo ai le faaiuga a le Faamasinoga i le suafa Malietoa o Malie ma Sapapalii lea na tuuina mai e le Faamasinoga o Uluai Suesuega i le aso 22 o Tesema, 2017. 

O lea faaiuga na faamaonia ai le Faasalalauga i le Savali o le aso 28 o Iuni 2017 i le faanofo ai o Faamausili Moli Malietoa i le suafa Malietoa.

O loo faailoa o le mafuaaga o le talosaga mo se faatagaga e toe iloilo le faaiuga ona o loo faapea mai e lei iai se autasiga i le aiga i suli o Moli, Gatuitasina, ma Talavou i le nofo ua faamaonia.

E sese foi le faasalalauga i le Savali i le aso 28 o Iuni 2017, atoa ai ma le fesiligia e nisi itu talosaga o faamaumauga o talanoaga sa faia i le faamasinoga latou te lei maua.

E lima itu na talosaga ae tasi le itu tetee.

O loo manino mai i mau a le itu tetee sa latou lagolagoina le nofo ma sa uia uma ala o le aganuu e pei o faasalalauga i le TV ma leitio e logo ai le aiga i feiloaiga e 11 sa faatinoina i maota o Poutoa ma Pouesi i Sapapalii.

O ia talanoaga na malilie ai loa i le aso 13 o Me 2017 o le a tuu atu le 30 aso i suli o Moli e filifili ai sa latou nofo.

O nisi foi mau na faapea mai o le talanoaga sa toe faia i le aso 13 o Iuni 2017 na faaali atu ai e suli o Moli ua autasi e nofo Faamausili Moli i le suafa Malietoa.

O le talanoaga foi lea na malilie ai loa le aiga, a afu le nofo a Faamausili Moli o le a faasolo loa i tino o Gatuitasina ma tuu atu iai le 12 masina e saili ai sa latou nofo, a leai ua faasolo loa foi i suli o Talavou.

O nisi o molimau a suli o Talavou sa latou lagolagoina i la latou tala tusia le faaiuga o le Faamasinoga o Uluai Suesuega peitai na toe suia la latou mau e ala i le mau tuufofoga e teena le faasalalauga ma le faanofo o Faamausili Moli i le suafa Malietoa.

O itu tetee poo i latou e lagolagoina le faaiuga a le Faamasinoga o Uluai Suesuega ua manino mai o suli lava o Moli, Gatuitasina ma Talavou.

I le iloiloga la a le Faamasinoga ua manino ai e le o mafai e itu talosaga ona tuuina atu ni mau fou poo ni mau ‘anoa i le faamasinoga auā o mau lava ia sa tuuina atu i le uluai suesuega lea ua toe tuuina atu i le talosaga apili.

E talitonu foi le faamasinoga pe a fua i le mamafa o mau ma le faaiuga a le Faamasinoga o Uluai Suesuega sa atoatoa lava le silasila ma iloiloga a le Faamasinoga o Uluai Suesuega i le mataupu lenei i le 2017.

Tala sili ona faitaulia

SAMOA UPDATE

TALA FOU MAI SAMOA

Tapunia lala a le ASB 

E 5 lala o le faletupe a le ASB o lea ua tapunia.  O lala i Mangere Bridge i Aukilani, Milford, Wellsford, Waiuku ma Willis

Toaono na pue e leoleo ona o tapaa

E toaono alii mai Vitoria lea ua feta’ua’ina le molia i le asō ona o le taumafai e aumai faasolitulafono sikaleti ma tapaa e miliona

Keep uptodate with Radio Samoa activity & promotion

* indicates required