O se tausaga ese le tausaga ua mavae i le tele o sauniga tau saofai na faaee ai suafa tāua o aiga aemaise o suafa matai alii ma tulafale.

O le agaga lava e pei ona faasalalau i le tele o faasalalauga o faatalanoaga ma faamoemoega o le sailia o nisi e tausia ma vaaia aiga.

O le maitau a le Matagaluega o Faamasinoga o Fanua ma Suafa, o se tausaga ese le tausaga na mavae nei ona o le faatupulaia o faiga saofai i le vaitau o aso malolo.

E lē o ma’oti mai le faitau atoa o suafa matai ua mafai ona resitara, ona o loo solo atu pea mataupu tau resitara o suafa matai, ae ua o faatasi resitara o suafa ma tusi talosaga taofi.

O le 50 pasene o pepa saofai mai i le tausaga ua mavae o loo taatitia ai ma tusi taofi.

Na saunoa foi Papalii i le mafuaaga o le tele o tusi taofi mai suli o aiga o loo faapea mai e lei iai se maliega na fai e faia ai ni saofai, pe lei logoina atu latou i ni saofai o le a faatino.

O le faaiuga o le masina nei na saunoa Papalii faatoa ma’oti ma iloa tonu ai le aofai o suafa matai ua resitara, e lē gata i lea o tusi taofi.

Ae na faaalia e se tasi o paaga a talafou, o le aso muamua lava ia talu ona toe amatalia galuega a le malo, e silia i le 50,000 tala tupe na maua a le faamasinoga mai i le resitaraga o suafa matai ma isi auaunaga.