Ua faamatuu mai e leoleo ata o lavalava na maua I tafatafa o si pepe lea na maua lona tinomaliu I le recycling centre I Aukilani I le vaiaso nei. O le pepe teine e pei ona faailoa mai I lipoti na maua I le po o le aso gafua I le nofoaga lea I Onehunga.
O le faamatalaga a le leoleo suesue o Scott Beard mai le ofisa o leoleo I Aukilani ua taua ai e ui I talosaga na tuu atu I le atunuu mo nisi e silafia ni faamatalaga I lenei mataupu ina ia fesoasoani ane peitai e itiiti lava si fesoasoani sa mauaina e le ofisa e ono iloa ai le pepe poo lona tina foi.
O le taeao analeila la lea ua faailoa ai e leoleo ata o lavalava na maua I talaane o le pepe I se tagapepa lanu moana. O lavalava pepe ma lavalava tamaitai.
Fai mai leoleo e le gata o le manaoga o loo iai ina ia sailia le tina o le pepe ma ia faamautinoa o loo saogalemu ae fia faamautu foi le tulaga o si pepe ma le mafuaaga ua aafia ai lona ola.
O loo taofia e leoleo nisi faamatalaga faaopoopo I le tulaga o le pepe ao talosagaina pea nisi faamatalaga e ono fesoasoani ai I lea mataupu.
