O au lakapi a Fiti, Samoa ma Tonga o le a taaalo i ni taaloga se lua i
totonu o Niu Sila o se vaega o le fuafauga toe iloilo a le Lakapi Iuni i le lalolagi ma o lea e fuafua o le masina o Iulai.
O le au a le Flying Fijians o le a fetaui faalua ma le au malosi a le All Blacks i le Aso 10 ma le aso 17 o Iulai ina ua lē oo le latou taaloga ma le au a Igelani ona o le Koviti 19.
Ua faamaonia mai foi e le Leitio Faavaomalo a Niu Sila o le sailiga ai o se avanoa mo le Ipu o le lalolagi 2023 i le va o le Manu Samoa ma Ikale Tahi Tonga lea o le a faia foi i Niu Sila.
E pei ona silafia o nei taaloga e masani ona fai i Apia Samoa poo Nukualofa i Tonga peitai ona o puipuiga lava o le faamai o le Koviti ma le tapunia ai o faigamalaga i totonu o nisi atunuu o le Pasefika lea ua ala ai ona fai i Niu Sila. O le aso 10 ma le aso 17 o Iulai o le a faia ai foi lenei taaloga.
O le au e manumalo mai i nei taaloga o le a faatasi atu i isi au tetele e pei o Egelagi , Iapani, Argentina i le Ipu o le lalolagi i Farani ae o le au faiaina o le a taaalo ma le au a le Atu Kuki mo se avanoa e auai ai i le taamilosaga a le Asia Pacific.
I le taimi nei e leo mautinoa pe e talosaga le Manu Samoa ma le Ikale Tahi a Tonga i latou tama taaalo o loo taaalo i isi kalapu i atunuu e mamao e auai i a latou taaloga i le masina o Iulai.
