O tapenaga o loo faatino auā le galuega o le aveesea uma o suāuu mai le vaa su’esu’e o le Manawanui, e faato’ā faagasolo pe a mae’a tuuina atu le fuafuaga poo le plan, i le Ofisa Sili o le pulega o le matagaluega o galuega tetele ma fela’ua’iga a le malo, o loo ta’ita’ifono i le komiti e faia galuega e puipuia ai le siosiomaga o le gataifale o le tatou atunuu mai ni suāuu masaa.
Ua faaalia lea tulaga i se pepa o faamatalaga o loo faalauiloa ai tapenaga o loo faatino, e pei ona fuafua o le aso 23 poo le 24 o le masina nei o Novema e taunuu ai le lagisi ma isi mea faigaluega mai Niu Sila mo le faia o le galuega o le aveesea uma o suāuu mai le vaa su’esu’e o le fitafita o le sami a le malo o Niu Sila o loo goto i ogasami i Saute o le atunuu.
Ua faailoa mai foi le auina atu i Niu Sila o pusaoloa poo containers e tolu na tafefea ese ma le vaa lea sa manuia galuega mo le aveesea mai gataifale o nuu o loo goto ai le vaa su’esu’e o le Manawanui.
Sa aveesea atu ma Samoa ia pusaoloa e le vaa o le fitafita o Niu Sila le Canterbury lea sa i lo tatou atunuu i le vaiaso o loo feagai le atunuu ma le taligamalo i le fono a Malo o le Taupulega.
