Ua faaiugafonoina nei e le Kapeneta faigamalaga faavaomalo e 7 mo le masina fou o Novema ae fa malaga i le masina o Tesema ae ua lē taunuu malaga faapitoa o loo to toe mo le masina nei o Oketopa.
O le faatulagaina o malaga o Novema, Aso 9 o le malaga a le Qantas mo le auina atu o tagata galulue i galuega faavaitaimi i Ausetalia. Aso 13 o Novema o le malaga a le Air NZ poo le auina atu o tagata mai Niu Sila i Samoa.
O le Aso 16 o le malaga a le Qantas mo le auina atu o tagata galulue i galuega faavaitaimi i Ausetalia faatasi ai ma le faafoi atu o e o loo sue avanoa mo le toe foi atu i Samoa faapea i latou ua maea a latou konekarate faigaluega.
O le Aso 17 o le masina lava lea o le malaga a le Air NZ mo le auina mai o tagata galulue i galuega faavaitaimi i Niu Sila, o le Aso 21 e toe malaga ai le Air NZ mo le auina mai o tagata galulue i galuega faavaitaimi i lea atunuu.
O le Aso 27 o Novema o le malaga a le Air NZ mo le toe auina atu o tagata mai Niu Sila i Samoa ma le Aso 30 o lea masina o le malaga a le Qantas mo le auina atu o tagata galulue i galuega faavaitaimi i Ausetalia.
Mo faigamalaga faapitoa mo le masina faaiu o le tausaga le masina o Tesema 2021 e fa malaga ua faataatitia mai o le a faataunuuina. O le Aso 3 ua fuafua ai le malaga a le Qantas mo le auina atu o tagata galulue i galuega faavaitaimi mai Samoa i Ausetalia.
O le Aso 7 o le malaga a le Air NZ mo le auina atu o tagata mai Niu Sila nei i Samoa ma o le a faia ai foi ma le isi malaga a le Qantas i le aso lava lea mo le auina atu o tagata i galuega faavaitaimi i Ausetalia ma faafoi atu ai tagata mai Ausetalia i Samoa.
O le Aso 9 o Tesema o le malaga a le Air NZ mo le auina mai o tagata i galuega faavaitaimi i Aotearoa ma o le a faia ai foi le malaga a le Fiji Airways mo le auina atu o tagatanuu Samoa o loo iai i Fiti mo aoaoga ma galuega ma malaga atu ai foi ma fanau sikolasipi o le atunuu ua maea a latou suega.
O le malaga mulimuli o le Aso 20 o Tesema o le malaga lea a le Qantas mo le auina atu o tagata faigaluega i galuega faavaitaimi i Ausetalia.
O le Komiti o Faalavelave Tutupu Faafuasei faapea faalavelave matuiā o le a mataituina le faagasologa o nei malaga ae taimua ai le Matagaluega o le Soifua Maloloina e ala i le tausisia o aiaiga uma faalesoifua maloloina mo le malaga atu i Samoa ina ia mautinoa le malu puipuia lea o le atunuu mai le Koviti19.
