Ua tatala aloaia le vaiaso faapitoa mo i latou e iai aafiaga tumau o le tino i le atunuu poo le National Disability Week.
O lenei faamoemoe na auai ai nisi o faalapotopotoga tumaoti ae faapea sui o le malo aua le faamanatuina o lenei vaega taua. Na faia foi nisi o vaega e falaauiloa ai galuega e le gata o le Nuanua o le Alofa, le Samoa Spinal Network, SENESE faapea ma le Special Olympics.
O le Minisita o le Tina ma Tamaitai le afioga Leota Laki Lamositele na saunoa e tatala lea vaiaso faapitoa ma na ia taua i lana lauga autu “I faamaumauga a le Malo Aufaatasi ua faamauina ai le 15% poo le 1 piliona tagata i le lalolagi o loo iai aafiaga tumau o le tino ma mo Samoa lava ia e nao le 2% mai le 15% lea o tagata o le atunuu o loo iai aafiaga tumau o le tino, o lona uiga e to’a 3000 le aofai o tagata.”
Taua foi e Leota “E 37% o tagata e iai aafiaga tumau o le tino i totonu o Samoa na ausia aoaoga maualuluga, 38% e mafai ona faitau ma le 35% e mafai ona tusitusi”.
Na faailoa foi e le afioga i le Minisita e ui i le tele o pa puipui e feagai ma i latou e iai aafiaga tumau o le tino peitai o loo iai nisi o vaega ua maea ona fausia mo le faafaigofie iai latou ona feoai i nofoaga faitele faapea ofisa faigaluega e pei o le auala sīmā, faapea foi e faatauaina o le faaogaina o le gagana faitaga.
O lenei vaiaso faaptioa ua faamanatu ai ma se vaega o le 16 aso o polokalame faagaioi poo le 16 days of Activism programme.
