O le 50 ai nei o tausaga o le faigapaaga a le Malo o Iapani ma le Malo o Samoa lea o loo tele atina’e ma fesoasoani o loo sasaa mai e lenei atunuu mo Samoa auā le taumafaiga o lona tamaoaiga i soo se vaega.
O lenei faamoemoe na saunoa ai le Palemia o Samoa, Afioga Fiame Naomi Mataafa i nisi o atina’e o loo fesoasoani tele mai ai le Malo o Iapani.
“O loo faaauau pea e Samoa le faipaaga ai ma le Malo o Iapani.
“O le polokalame o loo aumai ai nisi o tagatanuu o Iapani e galulue i Samoa nei o se tasi lea o vaega tāua o loo manuia ai tagata Samoa i ona atina’e.
“Ua tele tausaga o loo vaaia pea le lagolagosua a le Malo o Iapani i vaega o loo ave iai le faamuamua a le Malo o Samoa o loo faapea ona faataatitia mai i ona alafua.
“O nei fesoasoani ua le gata lea i soo se atina’e ae o le itu tau i aoaoga o loo maua avanoa i nisi o polokalame.”
E pei ona ta’ua e le Palemia e le gata i Samoa nei ae o le Pasefika lea o loo sasaa ai fesoasoani a lenei Malo auā le agai luma o tamaoaiga.
“O nei atina’e mo Samoa e aofia ai le auina mai o le Lady Naomi IV i le masina o Novema o le tausaga ua mavae, faatasi ai ma le vaa o le Tilafaiga lea sa tuuina atu i le Matagaluega o Leoleo auā ana auaunaga i le gataifale.
“O ia fesoasoani e atagia ai le mauaa o le Malo o Iapani i le tuuina mai o le tau’au e fesoasoani ai ia Samoa ma ona tagata.”
Na faafetaia ai foi e Fiame le talimalo a Iapani a o masii atu ai le aulakapi tele a le atunuu i lana taaloga ma le ‘au a Iapani i le masina ua tea.
