(PEPA O FAAMATALAGA) Ua sauniuni atu nei le Asosi a Tama ma Teine tuai o Malisi i
Aukilani Niu Sila le Marist Brothers Old Pupils Association poo MBOPA e faamanatu le
70 tausaga talu ona faavae le Kolisi a Sagato Iosefo i Samoa. O le Kolisi o Sagato Iosefo
ole uluai Aoga Kolisi lea na faavaeina i Samoa.
O le tausaga e 1950 na faavae ai ele Ituaiga o Felela Malisi le Kolisi o Sagato Iosefo ia
Fepuari, lea na faaalia e na ole 19 alii na amata ai ile Vasega 3 lea ua faaigoaina ole
Tausaga 9 (Year 9) i lenei vaitau.
E na o alii lava na amata ai le Kolisi ae o le tausaga e 1993 na faapea ai faaulufaleina
tamaitai ile Vasega 13. O le faamoemoe i Aukilani Niu Sila o le’a faia faatasi ma le
faailogaina o aso faamanatu o loo nafa ma le vasega o alii ma tamaitai tuai i Samoa.
Na faaalia e le taitai fono ole Komiti o nafa ma le faamoemoe i Aukilani le Afioga
Galumalemana Tai Galumalemana, “e tolu aso ua faatulaga ai le faamanatuina ole 70
tausaga ole Kolisi o Sagato Iosefo.”
“O le faamoemoe e amata lava ile sauniga lotu, ava ole feiloaiga, feiloaiga a tama ma
teine tuai ma aiga, taaloga, taumafataga autu ole 70 tausaga, ae faauma ile Taulaga
Paia ile Aso Sa ma le to’ana’i faatasi ona faamavae ai lea,” saunoa ai Galuemalemana.
O le faamanatuina ole 70 tausaga ua faapea foi ona valaaulia ai ele Asosi ale Malisi ia
le Asosi a Tamaitai Tuai a Sagata Maria i Vaimoso e latou te auai faatasi i sauniga uma.
O loo ua tuufaatasia Lanu e fa a Aoga e lua aua faamoemoe uma ole faamanatuina ole
70 tausaga.
Na saunoa Galumalemana, O auga ole faamoemoe ina ia mafai ona tatou tepa i le afu
liligi o na’i Felela Malisi lea na faatu ai le Kolisi ua aotauina ai taitai e le gata ile Malo
ae o Ekalesia foi, o ulu o matagaluega, faauluuluga o pisinisi aemaise le loaloa o Samoa
na ulufale faatama aoga i faitotoa o Sagato Iosefo i tausaga e 70 ua tuanai.
O le Kolisi o Sagato Iosefo na amata mai i Mulivai ona siitia lea i Lotopa ile 1960. O le
1989 ile ma’ea ole Aso Maliu na siitia ai le Aoga i Alafua i lona nofoaga o iai nei.
Na saunoa le peresetene ole Asosi a Malisi i Aukilani le Afioga ia Leota Saufua, “Ua umi
le savaliga na asa mai ai le Kolisi mai i faigata ma lavelave i tausaga ua tuanai aemaise
ia Felela Malisi na auasa mai vasa e tele ona ole finagalo ma le Talalelei ale Atua e ala
mai i aoaoga.”
Na saunoa foi Leota, “O lenei faamoemoe, o sa tataou lea faaopoopo ina ia faaauau
pea le folauga a Felela ma la latou galuega e ala mai i aoaoga lea ua sunu’i i laufanua
o Samoa ma ua ola lau’usiusi.”
E manatua pea ile talafaasolopito ole Kolisi ia alii talavou e 19 na iai ile vasega faavae
ile 1950. O i latou ia o: Petelo Vitale Mauga (Tafitoala), Harry Frost (Fa’ato’ia), Lino
Fepulea’i (Nofoali’i), Mikaele Fepulea’i (Nofoali’i), John (Lau) Young (Vaisigano), Ioane
Ah Yo (Tua’efu), John Fruean (Tufui’opa), Antepera Jacob Lee (Papauta), Albert Silvar
Mafua (Salouafata), Pama Faitalia (Lefagaoli’i Savai’i), Mareko Samoa (Sato’alepai
Savai’i), Keneti Felaga’i (Magiagi), Lu’uga Atonia (Mulivai), Heinrich Meredith, Gustav
Tedemann (Lepea), Otto Galea’i (Leone, Tutuila) Anipati Mailo (Fagatogo Tutuila), Jack
Manuel Betham, ma Otto Haywood Taylor.
E amata le faamoemoe i Aukilani ile Aso Faraile Novema 6 ile taamilosaga Golf ile
Chamberlain Park Course i Mt. Albert ile taeao.
O le afiafi ole aso lava lea e osia ai le Taulaga Paia ile Malumalu o St. Anthony i Mangere
Bridge ona sosoo ai lea ma le ava ole feiloaiga ile Fale o Samoa i Magele lava. O le maea
ole ava ona alo lea o lanu e fa ia latou faafiafiaga faatauvaga.
O le Aso Toanai Novema 7 ile itula e 8:00am e amata ai le aso taalo ile malae o Ngati
Park i Otara seia oo atu ile 3:30pm ile aoauli.
O le afiafi ile itula e 7:00pm e faia ai le Taumafataga Autu ole 70 tausaga ile Fale o
Samoa. E ulufale i pepa ua faatauina lea faamoemoe.
O le Aso Sa e osia ai le Taulaga Paia ile Malumalu St. Therese i Magele Sasae ona
faauma mai lea ile toanai ile Fale o Samoa ile 141R Bader Drive i Magele.
O ‘au e fa ma latou lanu a le Kolisi o Sagato Iosefo ole: Alfred (Green), Darnard (Yellow),
Dieter (Red) ma le Marcellin (Blue). O le a faatasi atu iai au e fa ma lanu tutusa a le
Kolisi o Sagata Maria e pei ole: Depores (Green), Avila (Yellow), Aquinas (Red) ma le
Orleans (Blue).
O le faamoemoe ole 70 Tausaga ale Kolisi o Sagato Iosefo ua mafai ona tuufaatasia ona
ole lagolagosua a kamupani e pei ona taua i lalo: G-MANA Wholesale Autos Ltd, Taula
ma le Galaxy Childcare lea ua avea ma lagolago autu. Kamupani oloo soa-lagolago:
Sleepwell, Vaetolo Celebrations, SSAB, Talimanao Catering, ACNIU Accounting Ltd,
Ben’s Piano & Furniture Moving Ltd, Molida Freight & Logistics, Pacific Ezy ma le Digicel
Samoa.