E ono tapunia i nisi taimi, ma e tuai foi i nisi taimi faigamalaga a taavale e uia le auala i Tiavi poo le cross island road, ona o galuega ua amatalia mo le toe fausia o lea alatele i le motu o Upolu.

Ua fautuaina e le Matagaluega o leoleo le atunuu femalagaa’i pe a uia lea auala aemaise i latou e faaaogāina i aso uma ina ia tausisia le saogalemu e mafua i galuega ua amata faatino i le masina nei seia paia Novema o le tausaga fou 2024.

O se tasi lea o galuega tele ua mae’a pasia e le Malo o le toe fausia o lea alatele, ae o galuega o le a amata i Tiavi ma agai atu i le magafa o loo fesootai ai auala i le tau atu i Siumu, ma agai ai i Falealili ma le agai i le atu Safata.

E 4 tesimale 2 kilomita le umi o lea vaega o le alatele o le a amata ai le galuega o loo faatupe e le Faletupe o Atinae o Asia ma e faitau miliona lona tau.

O se konekarate mai Saina ua manumalo i le tauofoga mo le faataotoina o le ata atoa o le galuega.

Mo le silafia o se tasi lea o auala o loo faaaogā tele e le atunuu i feoaiga i aso taitasi, e lē gata e vave mo le agai mai i Apia ae faapea foi i le agai atu i nuu ma afioaga o loo i le itu i Saute o le motu o Upolu.