Ua iai se faamanatu ua faamatuu mai e leoleo i le vaiaso nei e agai sa’o i mātua ma tagata matutua e vaaia tamaiti ma fanauiti a o tulalata le faamanatuina o aso fiafia o lenei tausaga.
O le faalavelave ua tulai mai i se auala pisi i Melepone i le vaiaso nei ua aafia ai se tamaititi fai mai e na o le lua tausaga le matua na lavea i se taavale ma uma ai lona ola.
O tala mai le 9News ua ta’ua o le tamaititi na taumafai e kolosi le auala ma lona tamā ae lavea ai i le taavale i Dandenong North i le aoauli ananafi.
Na taumafai paramedics e laveai le tamaititi peitai e lei manuia.
Faailoa e leoleo le mafatia o si aiga ua tupu ai le faalavelave .
O le avetaavale o le taavale na lavea ai le tamaititi o se tamā e 60 tausaga mai Gippsland ma o loo fesoasoani i leoleo i le suesuega ae e lē o taofia.
O loo faagasolo i le asō le suesuega ma siaki e leoleo ata mai le CCTV ma nisi ae o le fautuaga ua tuuina mai i mātua ia mataala ai ma faamautinoa le saogalemu o le fanau a o tulalata le faamanatuina o le aso Kerisimasi, o le aso e fiafia ai aiga ma tagata uma i le soifua mai o le Alii Faaola.
