Ua faamamā nei le suafa o le susuga Letasi Peter Andrew Pesamino o Fatausi i Savaii ina ua talia e le faamasinoga le talosaga a loia a leoleo, ina ia toe faasolomuli i tua moliaga o le umia o le nakoti o le ‘aisa sa tuua’ia ai lea tamalii.

O le mafua’aga na tuuina atu e le itu a leoleo ua lē lava ni mau e lagolago ai a latou moliaga.

O le Aso Gafua o lenei vaiaso na valaau ai le mataupu lenei e afua mai i le faai’uga a le Faamasinoga Maualuga na fofogaina ia Tesema o le tausaga na te’a nei, lea na manumalo ai le finau a le loia a Letasi sa lu’i ai le faatinoga o le osofa’iga a leoleo i le fale o lē sa molia, lea na faia e aunoa ma se tusi faataga poo se search warrant.

O le osofa’iga lea sa faatino e faaaogā ai le malosi’aga faaletulafono o leoleo o loo aiaia i le vaega 14A o le tulafono o nakoti o le tausaga e 1967 lea e mafai ai ona faia se osofa’iga poo se raid e aunoa ma le tau faia o se tusi faataga e su’e ai se fale ma se nofoaga o loo masalomia o loo faatino ai ni gaioiga solitulafono.

O le mae’a ona fofogaina o molimau a leoleo ma mau a lē ua molia ma lana loia na taunuu ai le faamasinoga i le faamaonia o le osofa’iga a leoleo na faia i le fale o Letasi lea na maua ai le 16 tesimale 8 kalama o le aisa faapea se masini e fua ai le mamafa poo se measurement scale, e le’i faamalieina aiaiga o le tulafono.

Na faia ai ma le poloa’iga a le faamasinoga o mea uma na maua i le fale i le osofa’iga e le faatagaina ona tuuina atu o ni mau mo le itu a leoleo.

O le talia e le Faamasinoga Maualuga o le talosaga a leoleo e toe ave i tua a latou moliaga, ua soloia ma faalēaogāina ai ia moliaga sa tuua’ia ai Letasi Peter Andrew Pesamino.