O le tuufesili o nisi tagata pe o le tapunia o galuega uma ona o puipuiga i poloaiga vavao o le faama’i o ni aso malolo faavaomalo ua aumai ai se faamaninoga o lea tulaga e le Ofisa o Pulega o le Matagaluega o Pisinisi, Alamanuia ma Leipa le susuga Pulotu Lyndon Chu Ling ma faamanino ai e le’o ni aso malolo faalemalo poo ni aso malolo mo tagata uma. 

I le Aso Gafua e oo mai i le ogatotonu o lenei vaiaso o loo faaauau pea ona tapunia galuega i le atunuu, ma aoga faapea ma le faagaioia o pisinisi ona o puipuiga lava o le faama’i seia vaganā le Aso Lua ma le Aso Tofi o lenei vaiaso ua na’o tagata faigaluega i pamu penisini, o faletupe, pisinisi talatupe faapea faletalavai ma vaega foi e faatau ai unite o le eletise sa galulue i nai itula. 

Ua faaalia e le Ofisa o Pisinisi, Alamanuia ma Leipa e lē agavaa tagata faigaluega i fua faatatau e masani ai o latou totogi o lona uiga e tumau tuutuuga pe a fai e totogi itula  pe totogi aso. Ae o tagata e totogi i aso o loo aiaia i le poloaiga o vavao e totogi lava i le fua faatatau o lona totogi masani.