Ua manino i le faaiuga a le faamasinoga e lei solitulafono le faafalepuipuina o le alii o Sio Agafili i le tausaga e 2020.

O lea mataupu na afua mai ina ua fesiligia e le faamasinoga i le 2020 le faatulafonoina o le umi o le faasalaga faafalepuipui o Agafili.

Na avea lea tulaga ma ala na faaulu ai loa le tagi a lea alii e faasaga i le Matagaluega  o Leoleo ma Falepuipui ma e lata i le $1miliona tala le taui na tagi ai i le Matagaluega e totogi atu ona o lona talitonuga ua aafia lana aia tatau ma lona tagata.

O le mau a lea alii e 4 tausaga ma le 7 masina na falepuipui ai, ma ua sili atu ma le taimi na faasala ai ia e le faamasinoga.

O le mau a Agafili sa tatau ona magalo i le 2015.

Ae i le mae’a ai ona iloilo vaega uma, na manino mai ai i faamaumauga a le Matagaluega o Faamasinoga o loo taatia le faaiuga i lena taimi e tuli eseese faasalaga e lua e tai 5 tausaga i moliaga o le gaoi ma le talepe fale.

Na poloaia e le afioga i le faamasino le lesitala ina ia tuu atu le faaiuga o le mataupu i le Minisita ma le Ofisa Sili o le Matagaluega.