Ua folafola i le asō e le pule o le lakapi liki le NRL, Andrew Abdo le faalauteleina o le taamilosaga a le itupa o tamaitai. O le Sharks, Raiders, Cowboys ma le Tigers o le a aofia uma ai i le taamilosaga o le tausaga fou 2023. 

O le taamilosaga lea i le itupa o tamaitai na amata i le 2018 i le na o le fā ‘au, le Broncos, Roosters, Warriors ma le Dragons peitai la o lea ua faailoa mai le faalauteleina o le taamilosaga lea i le asō.  

O isi kalapu na faaaopoopo ane i le tausaga na te’a nei e aofia ai le Eels, Knights ma le Titans. O le Roosters na manumalo i le taamilosaga o le tausaga talu ai ina ua faia’ina ai le Dragons.  

Faaleo la le fiafia o le faiaoga o se tasi o kalapu le Tigers, Justin Pascoe i le faai’uga ua faia e le pulega fai mai a ia o se avanoa mo le atina’eina o tamaitai i le taaloga ma ua matauina le faatupulaia pea o le aofai o tamaitai ua auai atu i le kalapu.