Ua iai le fuafuaga a le Malo e tuu eseese le matagaluega o faatoaga, ma le ofisa o faigafaiva, i se taumafaiga e atiinae faigafaiva i le atunuu i se isi tulaga e sili atu ona lelei ma maualuga.
Na faailoa lea fuafuaga e le Minisita o Faatoaga ma Faigafaiva le susuga Laauli Leuatea Polataivao Fosi Schmidt, i le sauniga na faailoa aloaia ai le tusi taiala mo le asosi o le autautai poo faifaiva o Samoa, lea ua faataoto ai taiala mo le puipui lelei o ogasami o le atunuu o le tuuga’oa lea o i’a ma figota o loo faaaogā e le autautai i aso uma, e le gata o faiva i le aloalo, ae o faiva i tua’au ma ogasami loloto.
Na faailoa e le Minisita i le aufaifaiva na auai aemaise o i latou o loo lagolagoina malosi lea atinae tāua, ua iai nisi o fesoasoani ua lata ina taunuu e pei o pusaaisa malolosi poo freezers o le a tufatufa i sui o le asosi, faapea foi nisi o vaega tāua mo le faaaogāina i luga o vaa fagota i taimi o ni faalavelave faafuasei e pei o ofu faaola ma faailoilo.
O Samoa o se atunuu e pito i laititi lona ogasami faatulafonoina ma o se itu tāua lea i le silasila a le Malo, ia malu ona puipuia lelei mai le soona fagotaina e vaa fagota tetele aemaise lava le aufaifaiva solitulafono.
