Ua iai ata fou a le CCTV ua faamatuu mai e leoleo i le latou su’esu’ega e faatatau i le gaoiga o le 63 afe o Bluey coins mai Western Sydney.
Fai mai leoleo o le aso 12 o Iulai o le tausaga nei na logoina ai i latou o se vaega tele o ta’i tālā, coins e lei faalauiloaina ae na gaosia e le Australian Mint, ua gaoia mai se warehouse i Wetherill Park.
Na faia le su’esu’ega a leoleo ma ua toe maua ai le 189 o ia coins mai ni alii se to’alua ua molia ma o loo i le faamasinoga pea le mataupu, peitai la o loo fia talanoa foi leoleo i se tasi alii na vaaia i se faletupe i Revesby, se avetaavale o se taavale lanu pa’epa’e SUV sa vaaia o faapaka i fafo ane o le faletupe lea faatasi ai ma le avetaavale o se tasi foi taavale na vaaia o fealua’i solo faataamilo i le warehouse lea na gaoia mai ai coins.
Ua faamatalaina le isi alii o se tagata Pasefika pe Maoli foi ma ua talosagaina nisi e silafia ni faamatalaga i lea mataupu ia fesoota’i ane i le Crimestoppers.
O Bluey coins o ni ta’i tālā ua lomia ai le ata o Bluey le ta’ifau, se ata mo tamaiti sa faaalu i le televise i Ausetalia talu le 2018 ma e toatele e fiafia iai ma faatau coins ia mo le aoina.
O loo faaauau nei le su’esu’ega.
Puna o Faamatalaga: https://www.9news.com.au/national/cctv-released-major-bluey-coin-theft-sydney-police-investigate/d3952b02-e604-4dc4-a477-11d0f6de9744
