Ua faailoa le suafa o le suitauva a le vaega faaupufai a le FAST mo le palota laititi a le Itumalo faapalota o Gagaifomauga Numera 2. O le fetalaiga Tiatia Lomia Tauloa ua tasi i ai le vaega faaupufai a le FAST e tauaveina le latou fu’a mo le tauvaina o se tasi mo le nofoa o le itumalo i totonu o le Palemene.
Saunoa le fetalaiga ia Vaaaoao Salumalo Alofipo, o le failautusi foi lea a le patī i sana faatalanoaga ma le leitio a le SOTF Radio Samoa USA, o le fetalaiga Tiatia Lomia Tauloa o ia lea na muai sii lona aao e fia tauva mo le FAST mai le itumalo Gagaifomauga Numera 2, i le faigapalota tele a le atunuu ia Aperila o le tausaga talu ai, 2021. Peitai ina ua oo atu le afioga Va’ele Paiaaua Iona Paiaaua Sekuini, ma faailoa lona manaoga e fia tauva, ona toe faaseetuagalu ai lea o Tiatia ae ave le faamuamua ia Va’ele, ma sa tu malosi ai e lagolago i le faamoemoe o Va’ele seia oo ina manumalo mai le tofi o le latou itumalo.
Peitai o le tuumalo faafuase’i o le afioga i le alii faipule ma o le minisita lagolago foi o le Matagaluega o Faatoaga ma Faigafaiva, ua toe avanoa ai nei le nofoa o le itumalo. Lea la ua toe tusi aao ai le vaega faaupufai o le FAST o le a toe ave le latou lagolago i le fetalaiga Tiatia, e avea ma o latou sui e tauva i le faigapalota laititi a Gagaifomauga Numera 2 ua faatulaga nei mo le aso 3 Iuni 2022.
O le palota lautele a le atunuu sa tauva mai ai sui e toalima mai le itumalo lea o Gagaifomauga Numera 2; e toatasi le sui o le FAST ae toafā sui na tauva i lalo o le fu’a a le HRPP lea sa aofia ai ma le tamaitai e toatasi. O lea foi na faailoa e le sui ta’ita’i o le HRPP i le latou feiloaiga ma tusitala, i le aso analeila, sui e toalua o le a tauva mai lalo o le fu’a a le latou patī, Sooalo Poka ma Sooalo Mene. E lei mautinoa mai pe iai nisi vaega faaupufai o le a faatū mai ai nisi sui tauva e ese mai le FAST ma le HRPP.
