Ua faailoa e le afioga i le Faamasino Sili le afioga Satiu Simativa Perese, nisi o polokalame ma fuafuaga a le faamasinoga o le a faatino i lenei tausaga fou, ina ua saunoa i le sauniga lotu faapitoa, e talosia ai galuega a le faamasinoga le Judiciary i lenei tausaga fou 2024 ua amata savalia.
Na faailoa e le Faamasino Sili, o le a tofia se faamasino mo le faamasinoga maualuga poo le faamasinoga sili a le atunuu, ma tofia foi ni faamasino se toatolu mo le faamasinoga faaitumalo le District Court.
O le masina fou o Fepuari o le a usuia ai i Samoa le fonotaga a Faamasino Sili o le Pasefika, o le a auai Faamasino Sili o faamasinoga o atunuu e pei o Papua Niu Kini, Niu Sila,Tonga, Niue, Fiti, Solomona, Nauru, le Atu Malesala poo Marshall Islands, faapea ma Vanuatu.
E tolu aso o lea fonotaga o le a faasoa ai usugafono i mataupu tāua mo tagata o le Pasefika.
Na faaalia e Satiu Simativa i lana saunoaga, “E lē o lilo i le silafia a le Atunuu ua amata ona aliali mai le tele o mataupu solitulafono matuiā e mafua mai i le faaaogāina o vailaau faasāina ma e tatau ai ona tapena iai le faamasinoga mo taualumaga o na mataupu, auā le saogalemu o Samoa ma ona tagata.
Ua momoli ai lana faamalo i le Malo e tusa ai ma le faasāina o ava malosi malolosi tele, e masani ona ta’ua o le rocket poo le jet fuel.
O le lagona o faamasino, e pei ona faailoa e le Faamasino Sili o le atunuu ua pa’ū le aofai o mataupu tau solitulafono e mafua mai i ia ituaiga o ava malosi, ua aafia ai o tatou tagata.
Ua ia faailoa se tasi o mataupu ua leva ona tatau ona tofia se faamasino e tauaveina le tofiga o le pule o maliu poo le Coroner, ae o se tasi lea o fuafuaga ua silasila nei iai.
O le tasi mataupu sa ia faailoa o loo taoto ai nei i luma o le Komisi o Galuega a le Faamasinoga o le toe iloiloina o feuiaiga sa taiala ai le Komisi i tausaga a o taitaifono ai lē sa avea ma Faamasino Sili ua tuumalo, le afioga Patu Tiavaasu’e Falefatu Sapolu.
Faaalia e Satiu o le tofiga o se faamasino o se mataupu maaleale, auā le puipuiga o tapu o le tutoatasi o se faamasino ma le faamasinoga.
Mo le silafia e le atunuu o le komisi lea e iloiloina taiala o le tofia o faamasino. O le vaiaso nei ua amata ai galuega masani o le fofogaina o mataupu i le faamasinoga.
