Search
Search

Faagoto i le moana sausau le vaa o le Lady Naomi

Ua tusia nei i faamaumauga a le Faalapotopotoga o Vaa a Samoa le Aso Lulu le aso 5 o Iuni o lenei tausaga 2024, na faagoto ai le vaa la’upasese o le Lady Naomi, lea ua taoto nei i le alititai o le moana sausau.

O lea vaa la’upasese o le faalapotopotoga o vaa sa tautuaina malaga i pasese ma uta i le va o Apia ma Pago Pago, peitai o tulaga faaletonu o le vaa ma ua lē toe saogalemu, na lē toe faaaogāina ai.

O le mafuaaga lea na toe asamo ai le Malo o Samoa i le Malo o Iapani ma aumai ai le sui o le Lady Naomi le vaa la’upasese fou o le Lady Samoa IV o loo fealua’i nei i le va o Samoa e lua.

O le Lady Naomi na fausia i le tausaga e 1998 e tusa o faamaumauga ma ua 25 tausaga o lona matua.

Ua faaalia i se lipoti le faia o le faaiuga e faagoto i le sami loloto le vaa, ona ua lē toe aogā ona fealua’i i ni faigamalaga.

E iai mea na tutupu e manatua ai le Lady Naomi a o tautua i le la’uina o pasese ma uta i le va o Samoa ma Amerika Samoa, peitai o le a manatua lea vaa la’upasese o le tatou Malo i le faasalaga tupe e 20 afe tālā Amerika na faasala ai e le faigamalo a Tutuila ma Manu’a i le tausaga e 2006 ona o se aulakapi mai Samoa na malaga ai ae taunuu i Tutuila e leai ni pemita e ulufale ai i le teritori.

Na nonofo ai lava i luga o le vaa le aulakapi na toe malaga mai le Lady Naomi ma aumai ona o lea faaletonu i o latou pepa malaga.

Na toe apili e le Faalapotopotoga o vaa a Samoa lea faaiuga i le faamasinoga i Amerika Samoa ma faatonuina ai e le faamasinoga a le teritori le toe totogi mai o le 20 afe tālā meleke o le sala, ona e sa’o le finau a le faalapotopotoga o vaa a Samoa, e lei ulufale se isi o le aulakapi i eleele o le teritori ona sa nonofo lava i luga o le Lady Naomi.

Ua 17 tausaga talu ona tupu lena faamasinoga na aafia ai le vaa la’upasese ua faagoto nei i le moana sausau, ma o le a avea ma mataaga i le lumanai mo nisi e fiafia i le faiva o le maulu e matamata i i’a eseese o le sami ua avea nei le vaa o le Lady Naomi ma o latou fale apitaga i le alititai o le sami loloto.

Tala sili ona faitaulia

TALA FOU MAI SAMOA

SAMOA UPDATE

PODCASTS

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required