O le tausaga na te’a nei 2024 o se tausaga sa maualuga ai le taumafai o le aulakapi a le Manu Samoa i le ta’ita’iga a le faia’oga ulu, le susuga Mase Mahonri Schwalger, lea ua talia e le Komiti Faafoe o le Lakapi Samoa lana faamavaega mai le tofiga faia’oga ulu o le aulakapi a le atunuu.

Ua faailoa e le ta’ita’ifono o le Komiti Faafoe o le pulega o le Lakapi Samoa le susuga Tuilaepa L Sailele Malielegaoi i se pepa o faamatalaga, lona faafetaia o le tautua ma le galuega lelei a Mase a o tula’i mai o le faia’oga ulu.

O se tasi o tulaga maualuga na ausia e le Manu Samoa i lana ta’ita’iga o le to’ilalo o le aulakapi a Italia i le taaloga ma le Manu Samoa.

O le ‘au a Italia o se tasi o ‘au i le vaega o ‘au lelei ma malolosi pito i luga i le Tier One.

O le taamilosaga o le Ipu o le Pasefika le Pacific Nations Cup o se tasi lea o tautua a Mase mo Samoa a o avea ma faia’oga ulu.

O le masina o Oketopa o le tausaga na te’a nei na faia ai le faai’uga a le Komiti Faafoe o le Lakapi Samoa e faamālōlō lē tumau le tofiga o Mase ina ua faia e leoleo ni moliaga tau faiaiga faasaga ia te ia.

O ia moliaga e lima o loo teena uma e Mase ma ua faatulaga ai le masina o Aperila o le tausaga nei e su’esu’e ai molimau a leoleo.

Ua faailoa e le Lakapi Samoa ua amata nei le sa’iliga mo se isi faia’oga ulu o le aulakapi a le atunuu le Manu Samoa.