Aso Lua 08 Setema, 2026.
O le soifuaga i le atina’e o se aiga i Samoa a lelei ma mautū le maota poo se laoa e nonofo ai, o se vaaiga lelei lea i le molimau a tagata i se nuu, e iloa ai ua siitia le atina’e o le lotoifale o se aiga. E fua lea vaaiga lautele i aso ma tausaga e tele ua tuanai a’o nonofo o tatou aiga i fale afolau ma faleo’o sa tanuma’a ae fola i polavai, auā sa to’aititi aiga sa gafatia se fale ‘apa e fa’asimā le fola.
Ua siitia le tamaoaiga o le atunuu, siitia ai ma tupe maua auā ua toatele aiga ua alala ‘aitau malele i fafo ma maua ai le tamao’aiga faaopoopo i seleni ua fausia ai maota ma laoa tetele o fausaga faaeuropa.
E ui ina maualuga lea tulaga i le tamao’aiga maua o le toatele o ō tatou aiga, ae o loo iai lava nai aiga o loo maualalo le tamao’aiga ma e le gafatia se fale’apa fa’asimā le fola. O le tāua lea o le polokalame a le malo na amata i le tausaga faaletupe 2025 i le 2026 na suia ai aiaiga o nonōgatupe i le faalapotopotoga o fale ma maua ai nai tupe ‘aitalafu mai lea faalapotopotoga a le malo ua mafai ai ona maua e aiga faatoa maua lea avanoa se fale lelei e faamautū ai.
E 6 miliona na faamatu’u e le malo i le tausaga faaletupe na mae’a ia Iuni o le tausaga nei ma fausia ai fale o aiga e limasefulu fā, o le taimi muamua ua saofaga ai i se nonogatupe e fausia ai se fale. Ua faailoa e le faalapotopotoga o fale a Samoa e 97 aiga na maua avanoa i le ono miliona e nonō ai e pei ona faailoa e le faalapotopotoga lea 54 o aiga ua maua ai ni fale mautū.
O le isi 43 aiga e atoa ai le 97 o aiga na maua avanoa i lea seleni tele e ‘aitalafu ai, sa toe fausia o latou maota ma laoa ia tetele ma ofi ai aiga e toatele fanau.
O isi na toe faafou ai o latou fale. O lea ua toe tatala e le malo lea fesoasoani i le tausaga faaletupe ua faagasolo nei.
