I le valaauina ai i le amataga o lenei vaiaso fou i le faamasinoga sili a le atunuu o moliaga o le faalemigao i le faamasinoga lea o loo tuuaia ai lē sa avea ma Palemia, o lē sa avea ma Fofoga Fetalai, o le sa seei i le tofiga Loia Sili ma le failautusi o le fono o loo faamālōlō lē tumau i le taimi nei.

O lea ua faaaopopo le isi to’afa o tagata i le moliaga lava lea e tasi ua aofia ai nei le sui taitai o le vaega faaupufai e Puipuia Aiā Tatau o tagata, o le sui filifilia a le Itumalo faapalota o Anoamaa No.2 le tōfa Lauofo Pierre Lauofo Meredith, o le Failautusi a le HRPP o le sui filifilia foi o le Itumalo faapalota o Faleata No.3 Lealailepule Rimoni Aiafi, o le sui lagolago o le HRPP sa avea ma faipule o le Palemene i se paeaiga ua tuanai le tamaitai Loia le afioga ia Maiava Visekota Peteru ma le sui faasalalau a le alaata televise o le TV1 le susuga Sioeli Alofaifo Taulealeausumai.

O le faaiuga o le vaiaso na tea nei na faaulu ai i le faamasinoga teuteuga o moliaga nei e aofia ai ma suafa o i latou e to’afa ua faaopopo atu. O saunoaga i faasalalauga e le gata o alaata televise le TV1 faapea luga o fesootaiga faaonaponei na faatūtū i nisi o faamasino o le faamasinoga sili ma le faamasinoga e mafua i le faaiuga a le faamasinoga talosaga apili na aloaia ai le faatautoga o sui toa 26 o le Faatuatua i le Atua Samoa ua Tasi ma aloaia ai foi le avea o lea pātī faaupufai ma faigamalo o loo faavae ai ia moliaga.

O le amataga o lenei vaiaso e valaau ai lenei mataupu e tauaveina e alii faamasino e to’alua mai Niu Sila ma o taualumaga nei o le a faaaoga ai fesootaiga televavave faaonaponei ona ua le mafai ona malaga mai faamasino ona o tulaga o puipuiga o le faama’i faapea le tapunia o tuaoi o le tatou atunuu i malaga masani.