E faate’ia le toatele i le maua mai o faamatalaga i le vaiaso nei e faatatau i se ofisa sipai mai atunuu i fafo sa faagaioia i le lotoifale o le ofisa tau fesootaiga ma puipuiga a Niu Sila, le NZ Government Communications Security Bureau (GCSB) mo ni tausaga e aunoa ma se silafia e le malo.
O le faamatalaga lea na faailoa mai e se sui o le Intelligence and Security o le ofisa lea o le malo.
Ua iloa ai o lea faiga poo le system sa faaaogāina mai lava i le 2013 e oo mai i le 2020 ae faamuta loa ona o se faaletonu i se meafaigaluega (equipment).
Fai mai le lipoti ua iloa nei sa malamalama le ofisa lea o le GCSB ina ua o latou malilie e faaaogā le faiga e faaigoa o le signals intelligence system, e ono mafai foi ona faaaogā e lagolago ai nisi o faiga tau militeli e isi paaga faavaomalo peitai latou te lei faailoaina lea tulaga i le malo ma lei malamlama foi iai le vaega sinia a le GCSB.
E ui i le faaletonu lea ua maitauina peitai i le mae’a o suesuega sa faatino ua iloa ai e lei iai se tulaga ua solia ai se tulafono ona sa usitaia uma lava aiaiga e pei ona masan ai e ui i le lē saogalemu o le faiga sa faaaogā.
Ua faailoa la i le agai atu i le lumanai o le a manaomia ona sailia uma ma ioeina e le faatonu aoao poo le minisita soo se faiga faavae fou e toe fia faaopoopo i le auaunaga ae lē gata i lea o ni maliega faavaomalo e toe faia.
