O le asō Aso 26 o Aukuso lea ua ripotia mai ai e le itulau a le HRPP i luga o le Facebook le faamutalia auaunaga a le Ofisa Sili o le Matagaluega o Tupe le afioga a Leasiosiofaasisina Oscar Malielegaoi. Ae ina ua fesiligia e nisi o tusitala i Samoa (Samoa Observer) pe faamaonia ripoti e faapea ua faamalolo nei e le faigamalo fou lana tautua i le Matagaluega o Tupe ae tali Leasiosio ” e leai e le mo’i ia tala ua faasalalau” those rumors are not true” lea na faasalalau e le facebook a le HRPP.

Peitai i ni fesootaiga ma nisi ofisa faasalalau (TV) i Samoa na taua ai e Leasiosio “Na tuu mai e le kapeneta ni vaega ou te filifili ai (alternatives) pe ou te faaamavae mai le tofi pea o le a faamalolo”.

O le amataga o le vaiaso nei na taua ai e Leasiosio i sana faatalatalanoaga ma le lomiga o le Newsline o ia e faateia i lafoga na faia e le afioga i le Minisita fou o Tupe Mulipola Anarosa Ale Molioo ua fesiligia ai le faatuatuaina o ia i le galuega ona o lona sootaga ma le taitai o le vaega faaupufai a le HRPP le susuga Tuilaepa Lupesoliai Sailele Malielegaoi.

Na ia taua foi poo le a lava le faaiuga a le Kapeneta ia te ia o le a talia ma lona mautinoa sa ia tautua ma le faamaoni mo Samoa i tausaga ua tuanai.

O Leasiosio o se alo e faasino ia Tuilaepa Lupesoliai Sailele Malielegaoi o le taitai o le vaega faaupufai a le HRPP, a faatautō e avea lona tamā ma taitai o le Ituagai, ma e ono faafaigata ai ona galulue faatasi ai Leasiosiofaasisina ma le Malo fou (conflict of interest).

O loo talia nei se tali aloaia mai le Ofisa Sili o le Matagaluega o Tupe e faamanino ai lana filifiliga i lona tofiga, a’o loma le faalauiloaina o le tala o le tupe a le Malo fou a taeao.