O le oia o le lotoifale o le vaega faaupufai o loo tauaveina le pulega o le malo e pei ona faamuta e le vaega to’atele o faipule o le faafaletui o le Faatuatua i le Atua Samoa ua Tasi le toe avea ma sui auai o le pati le Palemia ma minisita e to’alima, e lē o se faai’uga ua malepe ai le malo.

O le finagalo lea o le afioga i le Fofoga Fetalai le susuga Papalii Li’o Oloipola Ta’eu Masipa’u ina faailoa sona finagalo e tusa o le tusi atu a le ta’ita’i o le Itu Agai, le susuga Tuilaepa L Sailele Malielegaoi, ma faailoa atu le malepe o le malo ma ua tolu ai ma vaega faaupufai.

Faaalia e Papalii ua ave lana tusi e tali atu ai i le ta’ita’i o le Itu Agai, ma ua ia faailoa iai e lē o malepe le malo ae na o le lua foi vaega faaupufai o loo aloaia i le Palemene ua na o lana pati faaupufai e puipuia aiātatau a tagata ma le Faatuatua i le Atua Samoa ua Tasi.

O le feiloa’iga a tusitala ma le ta’ita’i o le Itu Agai i le vaiaso ua mavae na faailoa ai e Tuilaepa ua lē mautonu le malo ona ua va le fogavaa i le Palemia sa avea ma ta’ita’i o le vaega faaupufai o loo tu i le foe o le malo, ma le ta’ita’ifono ua avea nei ma ta’ita’i, aemaise ua ave le lagolago a le vaega to’atele o faipule o le latou faafaletui i le susuga Laauli Leuatea Polataivao Fosi Schmidt.

O le fesili i le malepe o le faigamalo o tu nei i le foe o le Sa o Samoa na fesiligia ai foi se finagalo o le tamaitai Palemia i le feiloa’iga ma tusitala i le Aso Faraile na te’a nei. 

I le avanoa na fesiligia ai le Fofoga Fetalai i le Aso Lua o le vaiaso nei na ia faailoa ai foi ua taunuu atu i lona ofisa se tusi mai le vaega faaupufai o le Faatuatua i le Atua Samoa ua Tasi ua faailoa atu ai ona sui faipule e 29.

O le Aso Lua 25 o le masina nei o Fepuari e toe tauaofia ai le Fono Aoao Faitulafono mo ana fonotaga faaauau.