Ua mavae atu le tausaga 2024 ae e lē galo ai i le faalapotopotoga o le Toomaga mo ē Puapuagatia le agalelei ma le loto fesoasoani o ekalesia, o pisinisi ma faalapotopotoga eseese e lē gata i Samoa a o atunuu i fafo, faapea tagata ta’ito’atasi sa lagolago i le galuega a le Toomaga o loo tausia ma vaaia fanau a le atunuu ua sauāina.

E lē gata o fanau a o tina o loo sulufa’i i le faalapotopotoga mo se lavea’i mai puapuaga ma sauāga ua aafia ai.

Ua faailoa e le Pelesetene le faletua o Siliniu Lina Chang le loto faafetai tele ia i latou uma sa agalelei atu i le tausaga ua mavae atu nei ma galuega a le Toomaga sa faatino ai.

O se tausaga foi e tele ni lu’itau ma matati’a sa ausia ai e pei ona asia le nofoaga o tausia ai fanau ma tina ua sauāina e le Masiofo a le Tupu o Peletania a o iai i le atunuu i le la asiasiga taualoa muamua faapea le auai i le fono a ta’ita’i o malo o le taupulega.

O le masina amata o lenei tausaga fou na afea ai le nofoaga e le mafutaga a tina o le faalapotopotoga o le Savali a Keriso Ministry.

Sa faia ai se foa’i a lea mafutaga ma saunia foi se taumafataga mo alo ma fanau o loo i le nofoaga o le Campus of Hope.

O ni finagalo faaalia o nisi o tina o le Savali a Keriso Ministry i se faasalalauga a le Toomaga i lana upega tafa’ilagi.