O le saunoaga lea a le tuaa a le afioga ia Faumuina Toaletai David Tua, i lona atalii o David Tua, ia aua ne’i galo le punāvai na e inu ai. 

O le uiga o lea upu tuutaliga a le tamā i lona atalii, “o le ola tautua” e tatau ona e toe foi e fai sau galuega fesoasoani i tamaiti lalovaoa o Samoa o loo fia maua lau taleni. 

O le taleni ma le meaalofa a le Atua ua tuuina atu ia te oe, e tatau ona e faasoa i soo se tagata aemaise lava i fanau, ma o lau tautua lena e tautua ai le atunuu, aiga faapea ma ekalesia. 

O le ola pea o le fatu sa totōina e le tamā i lona atalii, na afua ai ona tuufaatasia e le afioga ia Toaletai David Tua se polokalame i totonu o lana gym e valaaulia ai soo se tamaititiaoga e auai atu e faasoa iai lana taleni fusu, aoaoina le gagana Samoa faatasi ai ma le aoaoina o le amio. 

Ua fā nei o vaiaso talu ona amatalia lenei polokalame ma e talitonu le afioga ia Toaletai David Tua, ua tele se avanoa ua nonofo ai ma tamaiti ma talatalanoa ma fetufaai o latou manatu, pe a faasoa i le faatāua o le gagana Samoa e tautala ai, e tatau ona lelei le amio a le tamaititi Samoa, ma e koleni le tamaititi e iai sana moemitiga e tatau ona faataunuu. 

Auā a soifua maloloina le tino, ola le mafaufau, lelei le amio, ona paleni lea o le olaga o le tama ma le teine. 

Ua vaaia le naunautaiga o mātua e unai a latou fanau i lenei polokalame ona ua maitauina e mātua ua amata ona iai le suiga o a latou fanau i totonu o latou aiga. 

O nisi o fanau ua malosi le tautala i le gagana Samoa i aiga, a o nisi o fanau ua mafai ona faatino lava e latou nisi o fuafuaga fai i aiga e aunoa ma le faatonuga a mātua aemaise lava i fanau na ola ma fananau i Niu Sila nei, auā o le tasi lea vaega o loo autu iai lenei polokalame o fanau na fananau i atunuu nei. 

E 2 aso o le vaiaso o loo faatinoina ai lenei polokalame o le Aso Gafua ma le Aso Lulu ae o loo iai foi isi polokalame mo mātua ma isi tupulaga talavou matutua.