Lagi Keresoma - Peresetene Asosi Tusitala i Samoa

Aso faamanatu o saolotoga o galuega faasalalau

O le Aso Lua o lenei vaiaso le aso 3 o Me ua avea ma aso faamanatu ma faailoga ai e Malo Aufaatasi le tāua o le saolotoga o tusitala ma le aufaasalalau e faatino ai o latou tiute o le taulogologo o tagata i mataupu eseese e fesootai i le tamaoaiga, ma le soifuaga o aso uma.

O le tausaga nei ua faatāua ai i lenei aso le aogā tele o fesootaiga faatekonolosi i galuega a le autusitala ma le aufaasalalau. O ni auala o fesootaiga ua siitia ai le faatinoga o le galuega i le faaoo atu o faamatalaga ma ata i tagata, ae ua iai foi ma luitau ua fetaia’i ai ma le galuega. Ua avea foi lenei aso ua faatāua ai e le faalapotopotoga o tusitala ma le aufaasalalau a Samoa le JAWS le sao o ē sa galulue i lenei auaunaga i tausaga ua alu e oo mai i le taimi nei.

Faaalia e le Peresetene o le faalapotopotoga ia Lagi Keresoma, o le faigapalota a le atunuu i le tausaga ua mavae na avea o se isi lu’itau tele i le galuega ona o le saoasaoa o fesootaiga faaonapo nei ma lu’itauina ai faamatalaga sa tauave e ia fesootaiga televavave, a’o feagai le atunuu ma tulaga lē mautonu i upufai o le Malo. O ia foi fesootaiga na aliali ai i fafo ma nisi uiga sa fesiligia ai le tutoatasi e aunoa ma le pitotasi, o le tuuina atu e tusitala ma le aufaasalalau o faamatalaga i le lautele o le atunuu. 

O le tausaga e 1993 na aloaia ai e le Fono aoao a Malo Aufaatasi le avea o le aso 3 o Me e faamanatu ai le tāua o le saolotoga o i latou o loo galulue ma tautua i lea tomai faapitoa. 

Scroll to Top

Keep uptodate with Radio Samoa activity & promotion

* indicates required