O le afiafi o le Aso Lua o lenei vaiaso i Samoa ua amatalia ai le polokalame masani ua autausagā o faatino e le Ekalesia Faapotopotoga Kerisiano Samoa i Vaitele Uta, o pesepesega o le 13 aso o le Kerisimasi.
O se polokalame e pei ona silafia na amata i le Kerisimasi o le tausaga e 1997 a o galue le susuga i le faafeagaiga ua fai i lagi lana folauga a o galulue ma lona aiga i le tausia o le aulotu EFKS i Vaitele Uta, le susuga Faitala Talapusi.
O le tausaga nei ua atoa iai le 26 tausaga o lea polokalame o pesepesega o le Kerisimasi ua 26 foi tausaga o faasalalau e le faletelevise o le TV1 i Mulinuu.
O pesepesega o le tausaga nei o le a tatala e le aufaipese a Malu o le Malo.
Ua iai isi polokalame faapenei ua faatino e nisi o ekalesia i le agaga lava e tasi ia momoli le feau o le filemu e ala i pesepesega o le Kerisimasi.
