Amata faatalatalanoa le aveese o lafoga mai luga o faifeau tausi nuu

Na faamanino mai e le Taitai o le atunuu le tamaitai Palemia afioga Fiame Naomi Mafaafa nisi o fuafuaga a lana faigamalo i le tulaga o lafoga a faifeau ina ia aveese lea lafoga mai faifeau tausi nuu.

O le fonotaga a le Kapeneta i le Aso Lulu o le vaiaso na tea nei na amata ai iloiloga i lea mataupu i lafoga a faifeau.

O nei iloiloga o loo savali pea i luga o le anavatau a le vaega faaupufai a le Faatuatua i le Atua Samoa ua Tasi lea na laualuga i le taimi na sailia ai se malō fou a le atunuu e faapea a tulai mai o le a aveesea lafoga a faifeau.

Taua e le tamaitai Palemia i le feiloaiga ma Tusitala i le faaiuga o le vaiaso “Ua tuu atu le faatonuga i le Minisita ma le matagaluega o lafoga ina ia amata loa ona toe faatalatalanoa lenei mataupu aemaise foi o le nofo a Ekalesia i le agaga lava sa aumai ai le anava a le vaega faaupufai e aveesea lea lafoga mai luga o faifeau tausi nuu ona o se suiga o le a moomia e ao lava ona tāpā se finagalo ma faatalatalanoa foi ma Ekalesia i lenei mataupu taua.”

E pei ona silafia e tele o feeseeseaiga o manatu ma talitonuga a faifeau a nisi o Ekalesia ina ua faamamalu e le faigamalo ua tuanai atu le totogi o lafoga a faifeau i le tausaga e 2018 na i’u ai lava ina oo i le faamasinoga ona o le mau a faifeau a le Ekalesia Faapotopotoga Kerisiano Samoa e lē tatau ona totogi ni a latou lafoga.

Peitai o lea ua tulai mai le faigamalo fou ma o le a galulue e aveese lenei lafoga mai faifeau tausi nuu.

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required