Hon. Fiame Naomi Mataafa

Agai Samoa i le laasaga lua (Alert level 2) i le afiafi nei

O le itula e 6 i le afiafi nei i le maea ai o le piriota o le tapunia o Samoa o le a faamamalu ai loa suiga fou mo puipuiga mai le Koviti mai le lanu mumu i le lanu moli poo le laasaga lua (Alert Level 2). 

Ua faia lenei faaiuga ina ua talitonu le Kapeneta ma le Malo ua talafeagai ona agai i le isi laasaga o puipuiga. I le faasalalauga  a le tamaitai Palemia afioga Fiame Naomi Mataafa i le taeao nei na ia faamanino ma faalauaitele tulaga o suiga o le a iai. 

O poloaiga o faalavelave faafuasei vaega lona lua (lanu moli) 

E tumau pea le tele o poloaiga mo faalavelave faafuasei e pei ona iai le poloaiga numera 63 sei vagana ai vaega nei: 

  • O le a toe tatala galuega, pisinisi, maketi ma auaunaga uma a le malo. 
  • E faataga faatasiga ae tapu i le to’a 30 tagata i taimi uma 
  • E faatagaina na’o vaalele e aumai ai uta ma oloa i Samoa  seia iai nisi suiga. 
  • O le a faapafala faigamalaga mo tagata faigaluega faavaitaimi e malaga ese atu ma Samoa ma le ulufale i le atunuu seia iai se taimi. 
  • O le a taofia uma faigamalaga mo tagata e toe foi atu Samoa seia iai se taimi. E faaauau faigamalaga i le va o upolu ma Savaii ae tausisia le va e lua mita o tagata uma.  
  • O le a tatala le taunuu atu oloa ma vaa suauu i le uafu i Matautu ina ia faaauau pea ona maua oloa moomia mo le atunuu 
  • E faatagaina taavale laupasese i le taito’afā o le pasese, mo pasi  e faatapula’a pasese i le to’a 20 ina ia nonofo valavala.  
  • Taofia pea le tatalaina o aoga uma ae unaia le faia o faiga faatekonolosi ma isi auala faaonaponei e amata ai aoaoga ma o loo toafia pea fanau laiti i lalo ifo o le 12 tausaga ona feoai i nofoaga faitele. 

O aiaiga faalesoifua maloloina e ao ina usitaia i le laasaga lona lua e aofia ai vaega nei: 

  • Faaoga tali fofoga i taimi uma, tauave ma faaali pepa tui o le koviti i taimi uma  
  • Faamalosia le valavala o tagata e amata atu i le 2 mita  
  • Faaauau le faia o tui puipui mo i latou e lei faia tui puipui pe e lei maea ona fai tui puipui
  • Faaauau le faia o suega mo i latou o loo faanofoesea  
  • Amata le tui lona tolu poo le booster ma faasolo tūiga i falemai i taimi ua talafeagai 

E pei ona silafia o le aso ananafi na faamaonia ai le aafia o le toatasi ma oo atu ai le fainumera o i latou ua aafia i le to’a 27. O le toatasi lea ua aafia o se tasi o le pasese a le vaalele lea na malaga mai Brisbane Ausetalia i le Aso 19 o Ianuari, o se tasi na vava lalata le fesootai ma le to’a 20 na lavea muamua ma sa faanofoesea i le Falemai i Faleolo peitai lea ua avatu nei i Motootua i le nofoaga faapitoa. 

Taua e le Palemia e leai se faamaoniaga ua aafia se isi e ese mai le toa 27 ma ua maea suega lona tolu poo tests a le  aufaigaluega uma na muaau i lea aso na taunuu ai le vaalele o loo manuia uma i latou seia vagana ai le to’a lima o loo i nofoaga faapitoa  

O nisi ia o vaega na tagatagai ai le Kapaenta ma ua autasi ai loa e suia laasaga o puipuiga mai le lanu mumu i le lanu moli (Alert level 2). O lenei fuafuaga i le laasaga lua e faaauau mo le 2 vaiaso ona toe iloilo ai lea.

Scroll to Top

Keep uptodate with Radio Samoa activity & promotion

* indicates required