O le motu o Bau i le atunuu o Fiti o loo feiloai ai taitai faaleaganuu o le Pasefika e aofia ai le afioga Tui Atua Tuipua Tamasese Efi sa avea ma Ao o le Malo o Samoa, o le Tupu o Tagata Maori o Kiingi Tuheitia Potatau, ma se Alii Sili o Fiti mai le motu o Bau o Ratu Epenisa Cakobau, faapea se sui o le atunuu o Tonga.
O le autu o lea faatasiga o le folasia o finagalo o ia taitai faaleaganuu i mataupu eseese e faatatau i o latou tiute tauave i o latou atunuu e fua i le tulaga ua iai nei le lalolagi.
O se faatasiga ua faailoa e se lipoti e fesootai i fuafuaga ma tonufai a taitai o Malo o le Pasefika le Pacific Forum Leaders o loo vevete ai upufai o malo o le Pasefika i atinae eseese, aemaise lava i le mataupu o loo sili ona laualuga nei i faatasiga tetele a le lalolagi, o suiga o le tau.
E tolu aso o le fono a taitai faaleaganuu o le Pasefika, na amata i le Aso Gafua o le vaiaso nei 26 o Fepuari 2024, ae taualuga i le ogatotonu o le vaiaso le Aso Lulu 28 o Fepuari.
O le auai o le Tama Aiga mai lo tatou atunuu, ona o ia o se tasi o taitai ua iloga ona tulagaaao i le tele o atinae tau i le Pasefika, e lē gata i upufai o malo ae o lana faasoa i le faatāua o tu ma aganuu.
Ua fesootai lelei lea faamoemoe ma le tapena atu o atunuu o le Pasefika i le faaaliga tele o tu ma aganuu a motu o le Atu Polenisia, Maikoronisia, ma Melenisia o le a talimalo ai le setete o Hawaii i le masina o Iuni o le tausaga nei 2024.
