O le avanoa muamua lenei ua fai ai le taamilosaga taitoafitu a le Moana Pasifika mo alo ma fanau e i lalo ifo o le 16 i le 18 tausaga le matutua e mafai ai ona iai se naunautaiga o fanau ina ia atinaeina pea le taaloga lakapi i totonu o le Pasifika.
O lenei polokalame o loo faatautaia e le susuga i le faiaoga o le Moana Pasifika ia Faalogo Tana Umaga ma le au atoa lea sa faia i le malae a le Kolisi o Otahuhu i le Aso Toonai ua mavae.
O se fatofalaiga ua silasila mamao ai le susuga ia Faalogo Tana Umaga i le lumanai o alo ma fanau e mafai ai ona iai nisi sui o le Pasifika e mafai ona ofi mai i totonu o le Moana Pasifika i le lumanai pe a solosolo lelei pea le faagasoloina o le Super Rugby.
Ua tele nisi o tamaiti o le Pasifika ua mafai ona filifilia e nisi o ‘au a Niu Sila, ae pei o le fesili tele o loo tulai mai i le taimi nei, ae faafefea isi tamaiti?
Ma o le ala tonu lea o lenei polokalame ua tau amata a le Moana Pasifika.
O ‘au a atunuu eseese sa auai e aofia ai Samoa, Tonga, Fiti, Niue ma Tuvalu.
Sa auai foi sui o le ‘au atoa o le Moana Pasifika e talatalanoa ma faasoa i mātua ma fanau sa auai i le malae ina ia unai fanau i le taaloga pe afai o loo fiafia iai.
E eseese aoga e omai ai tamaiti aoga, ma sa resitala tamaiti aoga i tama ma teine poo ai e fia auai i lea taamilosaga ona fai lea o le filifiliga a faiaoga o ‘au taitasi poo ai o loo agavaa i avanoa o lea ua aumai.
E telē se avanoa o lea ua maua e fanau aoga, ae o se avanoa foi ua maua e alo ma fanau o Samoa ma le Pasifika o loo iai lo latou tomai faafaiaoga o le lakapi e mafai ai ona latou faiaogaina ‘au a fanau nei.
O loo iai le faamoemoe o le susuga ia Faalogo Tana Umaga ma le pulega a le Moana Pasifika e faaauau pea lenei taamilosaga i tausaga taitasi mo fanau i lalo o le 16 i le 18 tausaga le matutua i tama ma teine.
