Search
Search

9 pine auro a Samoa i taaloga a le Oceania Weightlifting Championship

Ua faaalia manino le agaga fiafia o le afioga i le Peresetene poo le faiaoga ia Tuaopepe Asiata Jerry Wallwork i le matagofie o taumafaiga sa iai lana ausiisii uamea mamafa i le taamilosaga o le Oceania lea sa faagasolo i Manukau i le vaiaso ua mavae seia faamae’aina i le Aso Sa. 

O Samoa sa numera tasi ai ana pine auro i taumafaiga sa iai alo ma fanau o Samoa i le ausiisii i le vaega o talavou seia oo lava i tagata matutua. 

O le tauvaga lenei o loo sailia ai nisi o avanoa o alo o Samoa i taaloga o le Olympic i Pale i Falani i le tausaga nei. 

Ma o lea ua faaalia manino e le afioga i le Peresetene ia Tuaopepe Asiata, e toatolu nisi o le autaaalo o lea ua ausia le tulaga e tatau ai ona ofi atu i taaloga o le Olympic i le tausaga nei ma e faamautu ma faamausali atili le latou avanoa i Thailand i le isi tauvaga lea o le a sosoo ai ia Aperila. 

Toe tasi le tauvaga lea o le a tapena atu iai le ausiisii a Samoa e pei ona saunoa le susuga i le faiaoga, ona faamautu loa lea o le ‘au a Samoa i le Olympic i Pale. 

O le tauvaga lenei i Aukilani ua iai foi nisi alo o Samoa ua latou ausia nisi o matati’a e pei ona iai i nisi o tausaga ua mavae, ma o le isi fiafiaga lea i le ausiisii a Samoa ua tele le agai i luma o taumafaiga a le autaaalo auā se ‘ai mo le tapuaiga a le atunuu. 

O pine auro a Samoa na maua mai lea ia Nevo Vaipapa, John Tafi, Tovio Ah John (2 pine auro), Maeu Nanai, Don Opelone, Avatu Opelone (2 pine auro), ma Iuniara Sipaia. 

O pine siliva na maua lea ia Sanele Mao ma Lesila Fiapule, o le pine apa memea sa maua lea e le tamaitai ia Siena Stowers. 

O le faamalosiau a le tapuaiga a Samoa sa autovaa atu ma maimoaina lea tauvaga i le vaiaso ua mavae sa fesoasoani lea i taumafaiga a alo o le atunuu ia latou taaloga. 

Na taualuga le tauvaga i le siva tau a le ausiisii ma tapunia ai loa le tauvaga a le Oceania i lenei tausaga i Aukilani. 

O le Aso Gafua e toe taliu ai le ‘au i Samoa auā le toe faaauauina o ana tapenaga mo Thailand i le masina o Aperila.

Tala sili ona faitaulia

POLOKALAME A LEOLEO

Tala mai samoa

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

Keep uptodate with Radio Samoa activity & promotion

* indicates required